Aleanca për Ardhmërinë e Kosovës (AAK) nuk do të marrë pjesë në takimin e thirrur nga Presidentja Vjosa Osmani, në të cilin do të diskutohet për zgjedhjet në veri.
Në një përgjigje për Demokracia.com, drejtori për Informim i AAK-së, Lulzim Blaka tha se kjo parti që nga fillimi ishte kundër mbajtjes së zgjedhjeve në veri, pasi që sipas tij, nuk është momenti i përshtatshëm për mbajtjen e tyre.
“Qëndrimi i AAK për zgjedhjet në veri, që nga fillimi kur është hapur kjo temë, ka qenë që ato të shtyhen, sepse kemi vlerësuar se nuk është momenti i përshtatshëm për mbajtjen e tyre. Ky është qëndrimi jonë që e kemi bërë publik në shumë raste e deklarata, tash e sa kohë”, tha Blaka.
Ai fton më tej që edhe paritë e tjera t’i bashkohen qëndrimit të AAK-së
“Andaj, ashtu si nuk kemi marrë pjesë në takimin e mëhershëm me Presidenten, nuk e vlerësojmë as tash të marrim pjesë, dhe kërkojmë që Presidentja dhe partitë e tjera politike të reflektojnë e të bashkohen me qëndrimin e Aleancës për Ardhmërinë e Kosovës”, tha Blaka për Demokracia.com.
Ndryshe Presidentja Vjosa Osmani pret sot në ora 14:30 partitë politike për konsultim lidhur me zgjedhjet komunale në: Mitrovicë të Veriut, Leposaviq, Zubin Potok dhe Zveçan.
