Kryetari i Lidhjes Demokratike të Kosovës, Lumir Abdixhiku ka shkruar në Facebook pas takimit me emisarin e BE-së për dialogun Kosovë-Serbi, Miroslav Lajçak.
Abdixhiku ka shkruar se i ka kërkuar sqarime Lajçakut në lidhje me preambulën, nenin 7 dhe nenin 10 të marrëveshjes.
Ai ka theksuar se LDK-ja e përkrahë dialogun, si dhe mbështet implementimin e të gjitha marrëveshjeve që janë arritur në këtë proces.
Tutuje Abdixhiku ka shtuar se nuk mund të ketë normalizim të marrëdhënieve me Serbinë pa njohje reciproke. E sipas tij, çdo marrëveshje pa njohje bie në përgjegjësi të Kryeministrit Kurti.
Postimi i plotë i Abdixhikut:
“Sot, pritëm ndërmjetësuesin e BE-së në dialogun Kosovë – Serbi, z. Miroslav Lajçak. Me të biseduam për ecurinë e procesit dialogues, me theks të veçantë për propozimin evropian në lidhje me normalizimin e raporteve Kosovë – Serbi.
LDK-ja i jep përkrahje procesit të dialogut, me ndërmjetësimin e BE-së dhe me përfshirjen e drejtpërdrejtë të ShBA-ve. LDK-ja rithekson se mbështet implementimin e të gjitha marrëveshjeve që janë arritur në këtë proces.
LDK-ja përsërit se Kosovës i duhet një marrëveshje e përqendruar te njohja e ndërsjellë dhe se asnjë marrëveshje tjetër nuk garanton normalizim të marrëdhënieve Kosovë – Serbi. Heqja dorë nga njohja është përgjegjësi e drejtpërdrejtë e kryeministrit Kurti dhe e institucioneve të tjera kushtetuese të Kosovës.
Në takim, z.Lajcak i kërkova sqarime në lidhje me tekstin e marrëveshjes së propozuar, në mënyrë të veçantë në lidhje me preambulën, me nenin 7, nenin 10 dhe me planin implementues të marrëveshjes së tanishme.”
