Kreu i LDK-së, Lumir Abdixhiku, ka bërë një status mjaft të ashpër në Facebook me kritika ndaj kryeministrit të Kosovës, Albin Kurtit dhe qeverisë që ai drejton. Këto kritika i bëhen në veçanti ndaj zhvillimeve në veri të vendit, e të cilat duket se janë jashtë kontrollit të Ekzekutivit.
Abdixhiku pretendon se kryeministri Kurti “tashmë ka rënë në kurthin e Serbisë.” Për ta mbështetur këtë pretendim, ai përmend dy fakte: “ai as s’mund të krijojë stabilitet e as të ushtrojë sovranitet në veri.”
Abdixhiku edhe në Kuvend të Kosovës i kishte kërkuar kryeministrit Kurti “planin” apo “strategjinë” për të ballafaquar gjendjen në veri, dhe një gjë të tillë ai ia kërkoi sërish.
Qindra zyrtarë serbë janë larguar nga institucione të ndryshme të Kosovës duke krijuar një vakum të madh institucional, por edhe në fushën e sigurisë. Kjo duket se nuk është situatë shqetësuese e prioritare për Qeverinë Kurti, çka ka provokuar këtë reagim të ashpër nga ana e liderit të partisë së tretë më të madhe parlamentare në Kosovë.
Fjalimet e kota e populliste nga foltoret në Prishtinë sot humbasin përbrenda thatësisë. Sot humbasin dhe zërat që i kërkonin Kosovës t’i shpërfaqë sovranitetin aleatëve tanë, tek po të njëjtit aleatë që thirremi sot për ndihmë kur bandat kriminale të Serbisë e Rusisë veprojnë në territorin tonë lirshëm e pa pengim.” – u shpreh z. Abdixhiku në këtë postim.
Kryetari i LDK-së në këtë pikë flet për zmbrapsjen e Kurtit në raport me zgjedhjet që parashihej të mbaheshin më 18 dhjetor në katër komunat me shumicë serbe por po ashtu edhe në raport me targat ilegale. Për të dyja këto çështje, Qeveria Kurti II ishte tërhequr pasi paraprakisht kishte pasur fjalë të mëdha që nuk linin derë për tërheqje.
Por, Abdixhiku shkon edhe më larg në këtë adresim para qytetarëve përmes llogarisë së tij në këtë rrjet social.
A është servilitet të ecësh përkrah aleatëve perëndimor të Kosovës? Sipas tij, natyrisht se jo.
“Ai (ecja me aleatë) shpërfaqet si servilitet vetëm përpara politikanëve të turmave e ideologëve anti-perëndim që për qëllim të hapur mbajnë rrënimin zhbërjen e Republikës së Kosovës.” – argumenton z. Abdixhiku.
Ai i ka sugjeruar Qeverisë Kurti II që të kërkojë ndihmë në mënyrë që të koordinojë hapat e saj për të kthyer rendin dhe ligjin në veri të Kosovës.
“Sjellja e vonuar, apo e pakoordinuar, është vazhdimësi e rënies në kurthin e Serbisë,” – përfundon Abdixhiku./nacionale
