Gjuha e urrejtjes, përçarjes dhe polarizimit politik po bëhet gjithnjë e më e pranishme në diskursin publik në Kosovë. Por ndërsa shoqëria përballet me pasojat e thella të saj, udhëheqësit politikë shqiptarë në vend zgjedhin shpesh të heshtin – një heshtje që nuk është neutrale, por pajtim i heshtur me urrejtjen.
Në një reagim publik, analisti dhe aktivisti Ajet Potera ka ngritur alarmin për këtë pasivitet politik, duke theksuar se mungesa e reagimit institucional dhe moral ndaj gjuhës përçarëse po shkatërron besimin mes qytetarëve dhe po gërryen vetë themelet e shoqërisë kosovare.
“Kur kjo gjuhë nuk kundërshtohet, ajo bëhet armë politike që shkatërron besimin mes qytetarëve dhe gërryen vetë themelet e shoqërisë. Heshtja nuk është neutralitet, është pajtim me urrejtjen,” – deklaron Potera.
Sipas tij, Kosova ka nevojë për udhëheqës që mbrojnë respektin, dinjitetin dhe vlerat e shoqërisë, jo për politikanë që legjitimojnë gjuhën e urrejtjes me heshtje. Ai thekson se kjo nuk duhet të ngatërrohet me heshtje përballë padrejtësive dhe korrupsionit – të cilat, përkundrazi, duhen luftuar me mekanizma ligjorë dhe vullnet të vërtetë politik.
“Kush merr pushtetin, nuk merr privilegj për miqtë e vet dhe për ata që i dhanë votën. Pushteti është përgjegjësi para të gjithë qytetarëve të Republikës së Kosovës,” shton ai.
Potera kërkon që udhëheqësit të jenë shembull i gjuhës së matur dhe të qytetëruar, duke theksuar se detyra e tyre është të mbrojnë sakrificat dhe kontributin e qytetarëve – jo t’i përdorin ato si kapital politik.
Ai mbyll reagimin me një thirrje të drejtpërdrejtë:
“Pyetja është e thjeshtë: A do të lejojmë që gjuha e urrejtjes të vazhdojë të helmojë shoqërinë tonë dhe heshtja e udhëheqësve të thellojë ndasitë? Apo do t’i detyrojmë ata të japin llogari për të ardhmen e vendit, për një Kosovë të bashkuar, e jo të përçarë?”
