Policia e Kosovës përmes një komunikate për media ka njoftuar se Drejtoria për Hetimin e Trafikimit me Narkotik në Gjakovë, ka zhvilluar një hetim për 3 muaj, i koduar operacioni “Mali”.
Operacioni është zhvilluar ndaj një të dyshuari për përfshirje në veprën penale “Blerja, posedimi, shpërndarja dhe shitja e paautorizuar e narkotikeve, substancave psikotrope dhe analoge”.
Në komunikatë thuhet se sonte, policia ka realizuar një plan, në koordinim me organet e drejtësisë dhe është pranuar urdhëri për kontroll në një fshat të Gjakovës.
Gjatë kontrollit, në shtëpinë e J.B., 49 vjeçar, policia ka gjetur dhe konfiskuar 32 paketime me lëndë narkotike që dyshohet të jetë marihuanë, me peshë 35 kg e 581 gr, një peshore digjitale, një telefon, një veturë e dëshmi tjera relevante për rastin.
Policia ka arrestuar të dyshuarin dhe pas intervistimit është dërguar në mbajtje për 48 orë.
