Vetëm dy ditë pas aksidentit tragjik në zonën e Durrësit, ku humbën jetën dy fëmijë të mitur, një tjetër ngjarje e rëndë që mund të kishte përfunduar në tragjedi është shmangur në qendër të Tiranës.
Mediat raportojnë se një automjet tip “Toyota Versus” pa targa ka çarë me shpejtësi kangjellat e hekurit në hyrje të sheshit “Skënderbej”, duke kryer manovra të rrezikshme që kanë vënë në rrezik serioz jetën e kalimtarëve të rastit dhe punonjësve të policisë bashkiake që ndodheshin në vendngjarje.
Sipas informacioneve të siguruara, automjeti fillimisht ka lëvizur me shpejtësi përgjatë bulevardit “Zogu i I” dhe më pas ka hyrë dhunshëm në ambientet publike të sheshit qendror. Ngjarja ka ndodhur në sy të shumë dëshmitarëve, të cilët janë detyruar të shmangeshin me nxitim për t’i shpëtuar goditjes nga makina, përpara se mjeti të përplasej me një nga gurët dekorativë pranë Muzeut Kombëtar.
Pavarësisht përplasjes me gurët, drejtuesi i mjetit ka vazhduar t’i japë gaz automjetit në përpjekje për të depërtuar më tej në brendësi të sheshit, ku në ato çaste ndodheshin disa grupe turistësh. Situata është vënë nën kontroll falë ndërhyrjes së dy punonjësve të policisë bashkiake, të cilët raportohet se kanë vrapuar drejt mjetit për të neutralizuar shoferin.
Ka qenë njëri nga efektivët ai që ka mundur të fusë dorën në timon, t’i heqë çelësin nga kuadri dhe të ngrejë frenat e dorës, duke bërë të mundur ndalimin e plotë të makinës që po lëvizte në mënyrë të pakontrolluar.
Drejtuesi i mjetit është identifikuar si Viktor Ndoka, me origjinë nga qyteti i Lezhës, i cili rezulton se ka jetuar prej 10 vitesh në Angli. Në momentin e ndalimit, Ndoka ka shfaqur shenja agresiviteti duke bërtitur me zë të lartë dhe duke kërkuar që ta linin të qetë.
Ai ka pretenduar para forcave të rendit se qëllimi i tij ishte të shkonte në Ambasadën Amerikane për të denoncuar kryetarin e Bashkisë së Lezhës. Pas ndalimit fillestar, në vendngjarje ka mbërritur menjëherë një patrullë e Komisariatit Nr. 3, e cila ka bërë shoqërimin e tij për në ambientet e policisë.
Për shkak të natyrës së pazakontë të ngjarjes dhe rrezikshmërisë së lartë, interes për rastin ka shfaqur edhe sektori i antiterrorit, të cilët kanë kërkuar të marrin kontakt dhe të intervistojnë autorin. Prokuroria e Tiranës ka regjistruar menjëherë procedimin penal me numër 6342, duke ngritur ndaj Ndokës akuzat për prishje të rendit dhe qetësisë publike, si dhe për kundërshtim të punonjësit që kryen detyrën shtetërore.
Megjithëse organi i akuzës kërkoi masën e sigurisë “arrest në burg” me afat dy mujor, Gjykata e Tiranës ka vendosur që Ndoka të qëndrojë në qeli për 45 ditë. Gjatë kësaj kohe, gjykata ka urdhëruar prokurorinë që të kryejë një ekspertim të hollësishëm psikologjik të personit të arrestuar për të sqaruar gjendjen e tij mendore gjatë kohës që kreu aktin e rrezikshëm.
