Ambasadorja gjermane në Beograd, Anke Konrad, tha se Kosova duhet të nisë diskutimet për themelimin e Asociacionit.
Në një intervistë për gazetën serbe “Blic”, Konrad thotë se tensionet në Kosovë në fund të vitit të kaluar treguan nevojën urgjente për një “qasje gjithëpërfshirëse për normalizimin e marrëdhënieve ndërmjet Serbisë dhe Kosovës”.
Gjermania pret formimin e Asociacionit të Komunave Serbe në Kosovë, thotë Konrad dhe shton se presin që kjo çështje të futet në agjendën e dialogut të zhvilluar me ndërmjetësimin e BE-së, transmeton Reporteri.net.
Konrad thekson se i dërguari i BE-së për dialogun ndërmjet Beogradit dhe Prishtinës, Miroslav Lajçak, ka mbështetjen dhe besimin e plotë të Gjermanisë për çështjen e Kosovës.
Kërkesën që Kosova të nisë diskutimet për themelimin e Asociacionit e kanë bërë edhe ambasadorët amerikanë në Kosovë e Serbi, Jeff Hovenier e Christopher Hill.
Hovenier, javën e kaluar e bëri të qartë se ShBA kërkon që Asociacioni i Komunave me Shumicë Serbe, të bëhet patjetër.
Hovenier ka theksuar se në këtë drejtim nuk ka opsion, pasi tha se Asociacioni është një marrëveshje ligjërisht e obligueshme, dhe ky qëndrim i ShBA’së nuk do ndryshojë.
“Mbetet një qëndrim i qartë politik i SHBA-së. Themelimi i Asociacionit të Komunave me Shumicë Serbe s’ka opsion. Është një marrëveshje ligjërisht e obligueshme të cilën Kosova e ka marrë përsipër. Një marrëveshje ligjërisht e obligueshme që është konfirmuar nga Kuvendi i Kosovës. Shtetet nuk mund të vendosin se çfarë marrëveshje ligjërisht të obligueshme e implementojnë apo s’e implementojnë. Ato janë marrëveshje ligjërisht të obligueshme. Kosova është një shtet që ndjek zbatimin e Ligjit”, ka thënë Hovenier. /Reporteri.net
