Pas kërkesës se vazhdueshëm të ndërkombëtarëve, por edhe reagimit të serbëve për largim nga institucionet, njohës të rrethanave politike në vend vlerësojnë se Qeveria e Kosovës duhet ta ri-mendojë dhe rishqyrtojë zbatimin e vendimit për t’i gjobitur serbët që nuk i konvertojnë targat në legale pas datës 21 nëntor.
Njohës të rrethanave politike në vend konsiderojnë që Qeveria e Kosovës duhet ta rishqyrtojë vendimin për konvertim të targave nga ilegale në “RKS”. Sipas tyre, kjo duhet të ndodhë për shkak të kërkesës së vazhdueshme të ndërkombëtarëve, por edhe për të mos eskaluar situata në pjesën veriore.
Analisti Artan Muhaxhiri ka thënë për Radio Kosovën se rishqyrtimi i vendimit për gjobat do të ishte vendimi më i duhur i Qeverisë se Kosovës.
“Vendimi më racional ndaj shtetit të Kosovës do të ishte që Qeveria e Kosovës ta ri-mendonte vendimin për gjoba pas kërkesave të vazhdueshme të aleateve ndërkombëtarë, të cilët i frikësohen ndonjë eskalimi me të madh, gjë që do ta kthente Kosovës shumë mbrapa edhe në procesin e dialogut por edhe në procese të tjera jetike institucionale”, është shprehur Muhaxhiri.
Profesori universitar, Dritëro Arifi ka thënë se edhe nëse fillohet me gjoba, ato nuk do t’i paguajnë serbët, prandaj sipas tij, nëse institucionet e Kosovës nuk kanë fuqi ta zbatojnë në tërësi vendimin, atëherë ai duhet të rishqyrtohet.
“Vendimi duhet të rishikohet, sepse mund të ngritën tensionet etnike për një vendim teknik, pra, ky vendim duket shumë i pamatur nëse nuk kemi fuqi ta implementojmë në tërësi”, ka deklaruar Arifi.
SHBA-ja dhe BE-ja në vazhdimësi kanë kërkuar nga Qeveria e Kosovës që vendimi të shtyhet për të paktën 10 muaj, mirëpo Qeveria që nga data 1 nëntor është duke e zbatuar vendimin e qortimit derisa, pas datës 21 nëntor do të fillojë gjobitja e qytetarëve që nuk i konvertojnë targat.
