Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.
Një rast i tillë i dhunës në familje është raportuar në orët e mbrëmjes në Gjakovë, ku një grua ka kërkuar ndihmën e Policisë për shkak të presionit dhe stresit të vazhdueshëm nga djali i saj, i cili dyshohet të jetë përdorues i narkotikëve.
Sinjali mëson se ngjarja ka ndodhur më 21 maj 2025, rreth orës 22:00, në rrugën “Tivari”, ku B. M., 63 vjeçare ka raportuar se djali i saj, Sh. M. 36 vjeç, e streson në vazhdimësi dhe i kërkon para, duke i shkaktuar gjendje të rënduar psikike.
Sipas viktimës, nuk ka pasur dhunë fizike, por përballja e përditshme me kërkesat dhe presionin e të birit ka bërë që ajo të mos ndihet e sigurt në banesën e saj.
Policia ka intervenuar menjëherë dhe, në konsultim me prokurorin kujdestar, i dyshuari është arrestuar dhe dërguar në ndalim, ndërsa rasti është nën hetim.
