Deputeti i Lëvizjes Vetëvendosje, Mefail Bajqinovci, ka hedhur dyshime mbi deklarimet e disa ditëve më parë se deputetë të Lidhjes Demokratike të Kosovës, me në krye kryetarin e saj, janë kërcënuar me vrasje. Në një shkrim në Facebook, Bajqinovci ka thënë se heshtja që pasoi raportimet “kristalizon dyshimin për lojë të ulët politike”.
“LDK-ja nuk na tha më asgjë për ‘atentatin’! Kosova ka nevojë për një mjedis të shëndoshë demokratik, ku partitë i ballafaqojnë idetë, ekipet dhe liderët e tyre politik duke u mundu me ju ofru qytetarëve përfaqësim sa më të mirë politik. Javë më parë, LDK na e solli në publik një lajm për atentat ndaj kryetarit dhe zyrtarëve tjerë aty, që padyshim merr vëmendje për shkak të ndjeshmërisë së natyrës së këtyre zhvillimeve”, ka shkruar Bajqinovci të shtunën në Facebook.
Ai ka thënë se LDK-ja nuk ka ofruar transparencë për rastin. Ka hedhur dyshime se ngjarja është përdorur për “vetëviktimizim si mjet politik”.
Më 19 janar, deputetët e LDK-së, si dhe disa të PDK-së, patën deklaruar se ndaj tyre ka pasur planifikime për atentat dhe se për një gjë të tillë janë njoftuar nga institucionet e sigurisë në vend. Megjithëkëtë, ata kanë deklaruar se nuk kanë informacione të hollësishme dhe se me çështjen janë duke u marrë organet e rendit.
Nga Policia rasti ishte cilësuar si “kanosje”.
KOHA ka dërguar pyetje në adresë të Lidhjes Demokratike të Kosovës për të marrë një përgjigje për akuzat e Bajqinovcit. Pyetje i janë dërguar edhe Policisë. Sapo të ketë përgjigje zyrtare nga palët, artikulli do të përditësohet.
