Deputetja e LDK-së, Hykmete Bajrami, ka kërkuar hetim pas deklaratës së ministres në detyrë të Ekonomisë, Artane Rizvanolli, e cila ka thënë se një MWH do të jetë 64,55 euro, pasi KEK-u do të blejë energjinë elektrike përmes bursës Shqiptare të Energjisë Elektrike ALPEX.
Rizvanolli, në profilin e saj rrjetin social Facebook, kishte thënë se ky çmim është nga sot pasi KEK-u, në cilësinë e Furnizuesit të Mundësisë së Fundit (FMF), furnizon të gjitha ndërmarrjet që kanë dalur në treg të lirë e nuk kanë arritur të nënshkruajnë kontrata furnizimi.
Për këtë çështje, Bajrami, pos që ka kërkuar hetim, ka pohuar se edhe çmimi në fjalë mund të kalojë deri në 260 euro për MWH. Sipas saj, ka edhe alternative të tjera që mund të sillnin një çmim më të ulët.
“Paska thanë KEK-u sot po e blen rrymën 64.55 Euro një MWh përmes bursës Shqiptare të Energjisë Elektrike ALPEX, por nuk po e shpjegon se këtij çmimi derisa të arrij te 1,300 ndërmarrjet e përjashtuara i shtohet plus kosto e transmisionit apo fitim i KOSTT-it, plus kosto apo fitimi i distribucionit KEDS, plus kosto apo fitimi i KECO-s(se faturimin dhe inkasimin e bën KESCO se s’ka qysh e bën KEK-u) dhe plus fitimi për KEK-un, se tash drejtorit të ri duhet me ja garantu performancën”, ka thënë Bajrami.
Pra, çmimi 64.55 euro për MWh nuk është çmimi final i energjisë, por është vetëm ajo që deri dje ka kushtuar 29.6 euro. Po Rizvanolli duhet me u përgjigj: Pse KEK-u po blen sot energji në ALPEX me çmim 64.55 euro kur çmimi në HUPX qenka 53.69 euro edhe pse s’po ju tregon ndërmarrjeve a ka KEK-u kontratë afatgjatë për blerje të energjisë apo gjysma e ekonomisë së Kosovës është në mëshirën e tregtarëve e kumbarëve të energjisë. Psh. nesër çmimi mesatar në ALPEX do të jetë 99.87Euro MWh. Mos harroni se KEK 60 ditë është furnizues i mundësisë së fundit, pas 60 ditëve, mandej kalohet te çmimi deri 260 euro MWh”, u shpreh Bajrami.
Duke shkruar në fund edhe fjalën: “Hetim!”.
