Trendi i parave të falsifikuara po vazhdon të ‘lulëzojë’ në Kosovë, ku qindra e mijëra euro fals vihen përditë në treg. Rastet e tilla raportohen kryesisht nga zyrtarët e bankave në vend, teksa kartëmonedhat që raportohen më së shumti si të falsifikuara janë ato prej 50 dhe 100 euro, raporton Gazeta Sinjali.
Banka ProCredit shumë herë ka rënë pre e bankënotave të falsifikuara. Disa raste të tilla kanë ndodhur në filialin e kësaj banke në Fushë Kosovë dhe janë denoncuar nga një zyrtar.
Sipas informacioneve që ka Sinjali, në bankomatin e kësaj banke, janë deponuar qindra euro, kartëmonedha 100-she, 50-she e 20-she, në periudha të ndryshme, që dyshohet të jenë të falsifikuara.
Pas denoncimit të rastit, paratë janë sekuestruar nga Policia dhe tashmë në koordinim me prokurorin e shtetit të Prokurorisë së Krimeve të Rënda, hetimi ka filluar për veprën penale “Falsifikim i parasë”.
Kujtojmë se kualiteti i parave false është shumë i lartë, saqë është e vështirë të detektohen pa aparatin përkatës.
