Tahir Batatina i Llapit i ka thirrur sërish liderët e 10 klubeve të ligës elitare kosovare, Superligës, në një takim për të folur për pamundësinë e klubeve për të përfituar nga ligji për sponsorizim, si pasojë e dështimit të Federatës së Futbollit të Kosovës për t’u licencuar në Ministrinë e Sportit.
Federata e Futbollit, e udhëhequr nga Agim Ademi i vendosur në arrest shtëpiak nën dyshimin për shmangie tatimore dhe keqpërdorim të parasë së federatës, ka dështuar t’i plotësojë kushtet dhe kërkesat për licencim tash e shumë muaj.
Pasi i dështoi takimi i së martës, i cili u bojkotua nga 10 klubet elitare, Batatina, një nga pronarët dhe trajneri i tanishëm i Llapit, ka kërkuar takim të ri për nesër në orën 12:00.
Në një letër dërguar klubeve përmes emailit të Llapit, që Nacionale e ka parë, Batatina u nënshkrua si kryesues i mbledhjes bashkë me pronarin e Trepçës Avni Haxhiun dhe pronarin e 2 Korrikut, Shaban Bahollin. Trepça dhe 2 Korriku bëjnë gara në kategoritë më të ulëta të futbollit në vend.
“Ju njoftojmë se nesër në orën 12:00 në selinë e Federatës së Futbollit të Kosovës do të mbahet takimi mes klubeve të Superligës. Pika e vetme e rendit të ditës: ligji për sponsorizim”, shkruhet në letër.
“Ky takim është thirrur nga anëtarët kryesues të mbledhjes: Tahir Batatina, Avni Haxhiu dhe Shaban Baholli.”
Klubet kryesore, si Prishtina, Drita, Trepça ’89 etj., nuk morën pjesë në mbledhjen e së martës dhe nuk kanë për qëllim të marrin pjesë as në atë të nesërme, duke e refuzuar kërkesën e Batatinës për t’u takuar për një çështje e cila është përgjegjësi kryekëput e Federatës së Futbollit.
Çfarë po ndodh me licencimin dhe pse është kaq i rëndësishëm?
FFK-ja, lideri i së cilës Agim Ademi ndodhet në arrest shtëpiak, ka dështuar të licencohet deri më sot kryesisht për shkak të dështimit për t’i plotësuar kërkesat dhe për t’i bërë ndryshimet e nevojshme për licencim që ia ka kërkuar Ministria e Sportit.
Fakti se Ademi dyshohet për shmangie tatimore dhe keqpërdorim të parasë së federatës dhe mundësia për një aktakuzë të re ndaj tij, FFK-ja do ta ketë pothuajse të pamundur licencimin me të në krye.
Përveç FFK-së, edhe klubet e kanë pjesën e vet të plotësimit të dokumenteve dhe ofrimin e një pasqyre se si organizohet klubi dhe cilët janë udhëheqësit e tij.
Derisa FFK-ja nuk është e licencuar, asnjë klub i futbollit në vend nuk mund të përfitojë nga ligji për sponsorizim, i cili është tejet i rëndësishëm për mirëqenien financiare të tyre.
Që nga dhjetori klubet nuk kanë mundur të përfitojnë nga ky ligj, i cili i liron investitorët e klubit të përfitojnë nga zbritja prej 30% nga tatimi./nacionale
