Kryetari i Komisionit për Siguri dhe Mbrojtje, Bekë Berisha, sot deklaroi se gjendja në veriun e Kosovës është shqetësuese dhe kërkon reagim serioz të institucioneve përgjegjëse të shtetit.
Berisha ka thënë se “Qeveria ka hyrë në një mal pa sakicë, dhe tash kjo gjendje duhet me u zgjidh, nuk pajtohemi të mbetet kështu si është”.
“Gjendja në veriun e Kosovës është shqetësuese dhe kërkon reagim serioz nga institucionet përgjegjëse të shtetit tonë. Popullin dhe Policinë e Kosovës nuk e trembin bandat dhe manovrimet që po bëhen në atë pjesë të Kosovës. Për shumë vite ne kemi punuar për paqe dhe siguri në të gjithë Kosovën. Paaftësia e qeverisë dhe gjithë këtij pushteti e kanë krijuar një gjendje të tensionuar të panevojshme me tema teknike të cilat i kanë kthyer në tema të sigurisë. Nuk duhet që të pranojmë këtë gjendje që është krijuar tash. Barrikadat duhet të hiqen nga policia dhe KFOR-i bashkë. Ne e kemi Qeverinë që ka hy në një mal pa sakicë, dhe tash kjo gjendje duhet me u zgjidh, nuk pajtohemi të mbetet kështu si është”, ka thënë Berisha në konferencë.
Berisha shtoi se barrikadat në veri duhet të hiqen nga Policia dhe KFOR-i bashkë.
Ai shtoi se nuk është dashur që për çështje të problemeve teknike, të kthehet veriu i Kosovës në problem të sigurisë. Por, shtoi se kjo situatë nuk bën që të mbetet status-quo, kështu siç është.
