Alarmi për një sulm ajror rus është dhënë sonte në Kiev, ku sipas dëshmive të cituara nga agjencia e lajmeve Reuters, janë dëgjuar shpërthime.
Komanda ushtarake e kryeqytetit ukrainas thotë në një postim në platformën Telegram se ka zbuluar dronët rusë dhe sistemet e mbrojtjes ajrore janë aktivizuar për t’i kapur. Ai gjithashtu u bëri thirrje banorëve të Kievit që të qëndrojnë në strehimore deri në fund të alarmit.
3 të vdekur në sulmin ukrainas në Kursk
Të paktën tre persona u vranë dhe nëntë të tjerë u plagosën në një sulm ukrainas në fshatin Bilaya në rajonin rus Kursk, një pjesë e vogël e të cilit mbetet nën kontrollin e trupave të Kievit pas pushtimit të befasishëm gushtin e kaluar, sipas një njoftimi nga autoritetet lokale.
Në një postim në platformën Telegram, guvernatori rajonal në detyrë Alexander Khinstein tha se forcat e armatosura ukrainase goditën një dyqan në fshatin Bilaya, duke vrarë tre persona dhe duke plagosur nëntë të tjerë, përfshirë katër adoleshentë. Hinstein dënoi krimin si “brutal dhe çnjerëzor”.
Me pushtimin e befasishëm të forcave ukrainase në rajonin rus të Kurskut në gusht 2024, Kievi shpresonte se sulmet në Ukrainën lindore dhe verilindore do të ndaleshin, se do ta detyronte Rusinë të tërhiqte forcat që përparonin në frontin lindor dhe se do të fitonte një favor më të madh në negociatat e ardhshme të paqes.
Megjithatë, trupat ruse vazhdojnë avancimin e tyre në pjesën lindore të Ukrainës, ndërsa forcat ukrainase raportohet se kanë humbur kontrollin e afërsisht 2/3 e territoreve që kishin pushtuar në rajonin e Kurskut.
Shefi i Shtabit të Përgjithshëm të Mbrojtjes Kombëtare të Ukrainës, gjenerali Oleksandr Shirsky, siguron se situata në Kursk mbetet “nën kontroll” dhe urdhëroi dërgimin e përforcimeve në zonë.
