Kryetari i Lidhjes së Qendrave për Punë Sociale në Kosovë, Blerim Shabani, ka akuzuar ministrin e Financave, Hekuran Murati, se për tetë muaj i ka injoruar kërkesat e QPS-ve për përballjen me sfidat me të cilat ballafaqohen këto institucione.
Ndër kërkesat që Shabani thotë se i janë përmendur Muratit ka qenë edhe ajo për sfidat në banim social për viktimat e dhunës në familje e për reforma në politikat sociale.
Në një shkrim në Facebook, Shabani ka thënë se QPS-të kanë kërkuar bisedë për “projektligjin për shërbime sociale dhe familjare (nuk është në agjendë fare); projektligjin për financat e pushtetit lokal (ku parashihet granti specifik dhe kontraktimi i shërbimeve sociale është heq nga agjenda); për udhëzimet administrative që presin për aprovim qe sa muaj e pengojnë nënat vetë ushqyese për ndihmë sociale në realizim të drejtës dhe viktimat e dhunës; për organin e kujdestarisë; për kolezionin e ligjeve; për numrin e vogël të stafit nëpër QPS-të e Kosovës dhe pamundësinë për të përballuar volumin e punës dhe nevojës për shërbime familjare; për domosdoshmërinë e investimeve në QPS; për infrastrukturën e dobët e me kushtet më të këqija në krejt Komunat; për mungesën e fondit emergjent për përkrahje direkte të klientëve; për reformën në SNS dhe ligjin e ndihmës sociale; për reformat në politika sociale; për sfidat në banim social për viktimat e dhunës në familje”.
Shabani ka reaguar një ditë pasi një grua shtatzënë u vra para Klinikës së Gjinekologjisë në QKUK. Bashkëshorti i saj, me të cilin ishte në proces të ndarjes, është i dyshuar për vrasje.
Ajo ka qenë e shtrirë në këtë Klinikë, në pritje për të lindur. Sipas burimeve të KOHËS, ajo ka dalë nga Klinika për të blerë diçka dhe derisa po qëndronte ulur para objektit të Gjinekologjisë, është qëlluar me armë zjarri nga i dyshuari. Trupi i pajetë i viktimës ka qëndruar për rreth dy orë në vendin e ngjarjes, ku Prokuroria ka gjetur tri gëzhoja të plumbave.
Shtatzëna e vrarë ka pasur urdhër-mbrojtje nga Gjykata Themelore në Ferizaj.
Sipas Ligjit për mbrojtje nga dhuna në familje, urdhër – mbrojtja është urdhri i lëshuar me vendim gjykate, ku parashikohen masat mbrojtëse për viktimën. Urdhri ia ndalon të dyshuarit t’i afrohet viktimës.
Ndërkohë bazuar në Ligjin për mbikëqyrjen elektronike, të dyshuarit për vrasjen e gruas shtatzënë, do të mund t’i vendosjes pajisja për mbikëqyrje elektronike.
Ligji përcakton që pajisja për mbikëqyrjen elektronike në rastet e urdhër-mbrojtjes, personit mund t’i vendoset edhe pa pëlqimin e tij. Por ky Ligj nuk është zbatuar.
Nëpërmjet kësaj pajisje, sipas Ligjit që ka hyrë në fuqi në vitit 2015, Policia, do të mund të përcillte vendndodhjen e personit të cilit i vendoset ajo. Sipas Ligjit, Policia e Kosovës, është organ përgjegjës për të kontrolluar mënyrën e realizimit të Mbikëqyrjes Elektronike.
Ministri Murati nuk është lajmëruar në thirrjet telefonike të KOHËS deri në momentin e publikimit të shkrimit.?//koha.net
