Përfaqësuesi i Lartë i BE-së për Politikë të Jashtme dhe Siguri, Josep Borrell, ka thënë se është koha që Serbia dhe Kosova të pajtohen për aneksin e zbatimit të Marrëveshjes për rrugën drejt normalizimit të marrëdhënieve dhe të shprehin qartë se si do ta zbatojnë atë, dhe për liderët të tregojnë guxim dhe përgjegjësi.
Në një bllog të publikuar sot në faqen e Shërbimit Evropian për Punë të Jashtme, Borrell ka thënë se pa normalizimin e marrëdhënieve ndërmjet Kosovës dhe Serbisë, nuk ka anëtarësim në BE dhe se dialogu duhet parë në një kontekst më të gjerë gjeopolitik, transmeton Paparaci.
“Agresioni i Rusisë kundër Ukrainës ka ndryshuar pamjen. Dialogu nuk ka të bëjë vetëm me Kosovën dhe Serbinë. Ai duhet parë në kontekstin aktual më të gjerë gjeopolitik, në një moment vendimtar në historinë evropiane”, ka thënë ky zyrtar evropian.
Ballkani Perëndimor është pjesë e Evropës. Dhe sigurisht që nuk është çipi që Putini do ta përdorë në ëndrrat e tij imperialiste, ka shkruar Borrell para takimit me presidentin serb Aleksandar Vuçiq dhe kryeministrin e Kosovës Albin Kurti në Ohër të shtunën, më 18 mars, përcjell Paparaci.
Borrell ka thënë se tema kryesore e takimit do të jetë Aneksi i Zbatimit të Marrëveshjes, i cili do të rezultojë me një normalizim të gjerë të marrëdhënieve midis Kosovës dhe Serbisë dhe në thelb me normalizimin e jetës së njerëzve në rajon dhe hapjen e rrugën për anëtarësimin e Serbisë dhe Kosovës në BE.
Borrell ka theksuar se Serbia dhe Kosova duhet të normalizojnë marrëdhëniet për t’u anëtarësuar në BE dhe se nuk ka tjetër rrugëdalje.
“Tani është koha që liderët e Serbisë, Kosovës dhe të gjithë Ballkanit Perëndimor të tregojnë guxim dhe të ndajnë përgjegjësinë për suksesin e procesit të anëtarësimit në rajonin e BE-së”, ka thënë Borrell, duke shtuar se detyra e liderëve është t’u sigurojnë njerëzve cilësinë e jetës që ata duan dhe cilësinë e jetës që sjell anëtarësimi në BE./Paparaci
