Janë bërë pesë vjet që kur është ngritur aktakuza e parë për rastin e “Veteraneve të rrejshëm”.
Për keqpërdorim të detyrës zyrtare, akuzohen ish-kryeministri Agim Çeku, ish-ministri i Mbrojtjes, Rrustem Berisha, ish-deputeti Shkumbin Demalijaj, Nuredin Lushtaku, Sadik Halitjaha e të tjerë.
Avokati i njërit nga të akuzuarit Sadik Halitjaha ka treguar se pse Gjykata e Apelit e ka kthyer në rigjykim këtë rast.
Madje ai ka folur edhe për rastin e të akuzuarit të tij Sadik Halitjaha, zëvendës komandant i zonës operative të Pashtrikut.
“Sipas aktakuzës së Prokurorisë ai akuzohet për keqpërdorim të detyrës zyrtare së bashku me gjithë anëtarët e tjerë për shkak se nuk i kanë shqyrtuar aplikacionet të cilët i kanë dorëzuar pra personat të cilët kanë pretenduar atë status. Një gjë është e sigurt se Komisioni i cili ka pasur mandatin nga Qeveria e ka pas të pamundur të përfundoj detyrën e tij siç është caktuar me vendim pasi që kanë qenë diku rreth 110 mijë aplikacione në total, dhe të cilat është dashur të kontrollohen nga Komisioni Verifikues”, thotë Esat Berisha, avokat për tëvë1.
E procesin gjyqësor të “Veteranëve” e kanë përcjellë nga afër edhe IKD-ja.
“Gjatë këtij rigjykimi ne kemi parë një elaburim të provova nga prokurori i Prokurorisë Speciale, Valdet Gashi i cili në seancën e fundit i ndau me zona operative të gjithë veteranët siç pretendonte Prokuroria Speciale që nuk i kanë plotësuar kriteret apo kushtet për të pasur statusin e veteranit që në total përfshinte ky numër i ndarë në këto zona 19 mijë e 500 veteran”, shprehet Flamur Kabashi nga IKD
Sipas kryetarit të OVL-UÇK-së në Pejë, është dashur qysh herët të parandalohen keqpërdorimet, duke përmendur faktin se janë mbi 100 mijë qytetarë të Republikës që kanë aplikuar për statusin e veteranit.
“Qysh në fillim është dashur të parandalohet, qysh në fillim është dashur të ketë kritere për të gjithë ata qytetarë që të kenë mundësi me aplikua. E për shkak të këtij problem që nuk na pas asnjë censurë për asnjë qytetar të Republikës së Kosovës. Problemi ka filluar në zanafillën e vet qysh kur është hap për herë të parë shpallja për aplikim”, thotë Gazmend Syla, kryetar i OVL-UÇK-së në Pejë.
Çështja e veteranëve të rrejshëm kishte ngjallur reagime të shumta në Kosovë.
