Projekti i Unazës së Jashtme të Kryeqytetit ka nisur një përplasje të re mes nivelit qendror dhe atij lokal. Sipas asaj që ka deklaruar dje Kryetari i Prishtinës, Përparim Rama, Ministri i Financave, Hekuran Murati nuk po ia jep një nënshkrim që nevojitet për të vazhduar tutje me projektin 350 milionësh. Për ish-kryetarin e Prishtinës, Isa Mustafa, do të ishte shumë e lehtë nëse problemi do të ishte vetëm te nënshkrimi i Muratit. Në një deklaratë për Express, ai ka treguar sfidat që do ta përcjellin Ramën për këtë projekt, pa realizimin e të cilave thotë se projekti do të mbetet vetëm vizatim.
Kryetari i Komunës së Prishtinës, Përparim Rama, ka fajësuar Ministrin e Financave, Punës dhe Transfereve, Hekuran Muratin, për bllokim të projektit për ndërtimin e unazës së jashtme të kryeqytetit.
Rama deklaroi se e kanë përfunduar dizejnimin e projektit, por se janë në pritje të nënshkrimit nga ana e Muratit që katër muaj, për të vazhduar tutje.
“E kemi përfundu dizajnin e unazës së kryeqytetit. Jemi në pritje të një nënshkrimi qe katër muaj prej ministrit të Financave për me leju me vazhdu në pjesën tjetër. Është një projekt madhor i kryeqytetit i cili është mëse i nevojshëm”, tha Rama.
Vlera e këtij projekti është 350 milionë euro, që sipas Ramës, është edhe arsyeja pse ministri s’po e jep nënshkrimin.
“Na vyen një firmë e ministrit të Financave, për fat të keq. Nuk po e jep për momentin…ministrit i duket shumë e madhe”, ka deklaruar Rama në Frontal të T7.
Gazeta Express ka provuar të marrë një qëndrim nga Ministria e Financave, Punës dhe Transfereve për këto deklarime të Ramës kundrejt Ministrit, por deri në publikimin e tekstit, s’janë përgjigjur.
Për ish-Kryetarin e Komunës së Prishtinës, Isa Mustafën, do të ishte e lehtë sikur problemi të ishte te vetëm një nënshkrim i Muratit për këto 350 milionë euro.
Mustafa i ka thënë Gazetës Express se këtij akti duhet t’i paraprijnë projektet dhe bilancet buxhetore të afatizuara dhe të aprovuara nga Qeveria, Kuvendi i Kosovës si dhe Kuvendi i Prishtinës. Pa këto vendime, Mustafa thotë se i gjithë projekti mbetet vetëm “vizatim”.
I pyetur nëse shuma e paraparë për këtë projekt është e lartë, Mustafa ka thënë se s’mund të flas për këtë, por se projekte të tilla s’mund të përballohen vetëm nga buxheti i kryeqytetit.
“Projektet e mëdha siç është unaza e Prishtinës s’mund të përballohen vetëm nga buxheti i kryeqytetit. Është e natyrshme dhe e nevojshme që të ketë përkrahje nga qeveria qendrore. Nuk mund të flas për shumat, sepse bilacet e investimeve rrjedhin nga projektet që duhet të vlerësohen në rastin konkret edhe me qeverinë e vendit. Do të ishte lehtë sikur problemi të ishte vetëm te ministri i financave, se a e vë ai nënshkrimin për 350 milionë euro. Por, këtij akti duhet ti paraprijnë projektet dhe bilancet buxhetore të afatizuara dhe të aprovuara nga Qeveria dhe Parlamenti i Kosovës si dhe Kuvendi i Prishtinës. Pa këto vendime mund të kënaqemi vetëm me vizatime!”, ka deklaruar Mustafa për Express.
Gazeta Express ka pyetur për këtë çështje edhe dy ish-kryetarët e tjerë të Prishtinës, Shpend Ahmetin e Ismet Beqirin, por asnjëri s’janë përgjigjur.
Për këtë projekt, janë deklaruar sërish sot nga Komuna e Prishtinës. Nënkryetari i kësaj komune, Alban Zogaj, ka thënë se do të insistojnë që ta ndërtojnë këtë projekt.
Ai ka bërë me dije se ky projekt është futur si prioritet edhe në programin politik të LDK’së “Rruga e Re”.
Zogaj ka thënë se ky projekt do të jetë autostradë që e rrethon Prishtinën, dhe lidhet me hyrjet kryesore në kryeqytet dhe se e shkarkon kryeqytetin nga komunikacioni, raporton Express.
“Unaza e Jashtme e Prishtinës është projekt strategjik! Është autostradë që e rrethon Prishtinën, dhe lidhet me hyrjet kryesore në Kryeqytet. Pra, lidhet me hyrjen nga Gjilani, me hyrjen nga Fushe Kosova, me hyrjen nga Mitrovica dhe me hyrjen nga Podujeva! E shkarkon Kryeqytetin nga komunikacioni i panevojshem dhe krijon lidhje te reja me zonat industriale! Unaza e Jashtme e Prishtinës është projekt Nacional.Ne do të insistojmë ta ndërtojmë këtë projekt, sepse fiton Prishtina, sepse fiton Kosova! Dhe, është futur si prioritet në Programin Politik të LDKsë ‘Rruga e Re’.”, ka shkruar Zogaj.
Edhe sipas analistit Agon Maliqi, një projekt i tillë duhet të realizohet. Madje, ai thotë se niveli qendror ia ka borxh kryeqytetit një projekt të përmasave të mëdha, si unaza.
Maliqi ka thënë se ky projekt do ta çlironte Prishtinën prej trafikut, ndotjes dhe kaosit urban.
“Nuk i njoh detajet për projektin e unazës së Prishtinës, por niveli qëndror ia ka kryeqytetit borxh një projekt të tillë të përmasave të mëdha që kish me e çliru prej makthit të trafikut, ndotjes dhe kaosit urban. Zona metropolitane e Prishtinës është kontribuesi bindshëm më i madh i taksave në buxhetin qëndror dhe nuk i kthehet aq sa i takon. Prishtina gjithashtu e ka barrën infrastrukturore për shumë shërbime të nivelit qëndror (me rezultat kaosin e lartpërmendur). Deputetët e Prishtinës në Kuvend (prej cilësdo parti) do të duhej të ishin më të zëshmit për këtë punën e unazës nëse duan të kenë fytyrë të kërkojnë votë herëve të tjera”, ka shkruar Maliqi.
Por, ndryshe po mendon deputeti i Vetëvendosjes, Dimal Basha. Ai është tallur me Ramën, duke thënë se edhe po të ishte Kryetar i Londrës e të kërkonte kaq para për një projekt, do të talleshin me të.
“Ky bashkëpunëtori i LDK-së niherë dul mashtroj publikun se qysh ky i ka ‘organizu’ Lojërat Mesdhetare, ku kontributin e vetëm në komplet procesin e ka veç një nënshkrim, sikur që e kanë edhe 6 kryetarë të komunave tjera. Tash paska thanë Qeveria po ma bllokon ni projekt që po kushtojka veç 350 milion euro. Po me pas kanë Kryetar i Londrës kishin ba hajgare m’i lyp 350 milion euro, e jo për ni udhë n’Prishtinë! Qysh ka thanë ai i moçmi, ide edhe unë kam plotë, veç a ki pula!”, ka shkruar Basha.
