Deputetja Blerta Deliu ka reaguar ndaj rastit të dhunës ndaj një të moshuare në Shtëpinë e Pleqve “Orenda” në Pejë, ku shihet infermierja teksa ushtron dhunë fizike mbi të moshuarën.
Deliu e ka quajtur “të frikshëm” këtë akt të dhunës dhe ka kërkuar që jo vetëm infermierja që ushtroi dhunë por edhe të gjitha vajzat prezente në atë video, të arrestohen, transmeton Gazeta Online Reporteri.net.
“E frikshme dhe e tmershme dhuna e shpërfaqur ndaj një gruaje në moshë. Edhe më e frikshme indiferenca e vajzave, në prezencën e të cilave dhunohej një grua. Të gjitha vajzat qe ishin prezente në momentet kur është ushtruar dhunë duhet të përgjigjen para drejtësisë. Institucionet të marrin masa për të vënë drejtësi ndaj këtij rasti të turpshëm”, shkroi ajo në Facebook.
