Hetimet nga Komisioni Parlamentar për dyshimet mbi aferën korruptive në Ministrinë e Tregtisë dhe Industrisë, e njohur si “Rezervat shtetërore” kanë dështuar. Kjo për faktin se ky komision ka përfunduar mandatin e tij akoma pa filluar punën. Lidhur me bllokimin e këtij komisioni ka reaguar edhe Instituti Demokratik i Kosovës (KDI).
Në një komunikatë për media, KDI thekson se deputetët e shumicës parlamentare kanë bllokuar punën e këtij komisioni me pretekstin e “mosvotimit të marrëveshjeve ndërkombëtare”.
Komisioni Hetimor për aferën “Rezervat shtetërore” ishte themeluar në seancën e 21 shtatorit të vitit 2023, me kërkesën e 41 deputetëve opozitarë dhe votën e 69 deputetëve, por edhe pse komisioni ka mbajtur 10 mbledhje, puna e tij në asnjë periudhë nuk ka përkuar me synimet e realizimit të një hetimi objektiv të bazuar në fakte, pasi ishte tërësisht e dominuar nga tendencat partiake dhe akuzat e ndërsjella.
Mandati i këtij komisioni përfundoi sot , ndërsa ky komision akoma nuk ka arritur të ndërtojë një plan të mirëfilltë të punës, pra nuk ka arritur të filloj hetimet, fazë kjo që në Ligjin për Hetim Parlamentar vlerësohet të jetë faza fillestare e punës hetuese. Për më tepër, tani kur kjo çështje është duke hetuar edhe nga Prokuroria Speciale, jo serioziteti, diskursi politizues dhe profesionalisht i mangët i këtij komisioni mund të cenoj vetë procesin hetues.
Ligji për Hetim Parlamentar përcakton mundësinë e zgjatjes së mandatit të një Komisioni Hetimor edhe pas periudhës hetuese të kufizuar në afatin 6 mujor. Porse, në kontekstin e Komisionit Hetimor për Rezerva Shtetërore, duke analizuar praktikën e deritanishme të vendosur përgjatë punës së këtij komisioni dhe faktin se lënda tashmë është në hetim nga organet e drejtësisë, mundësia e vazhdimit të mandatit vlerësohet jo e arsyeshme dhe jo produktive.
