Dymbëdhjetë persona, përfshirë dy fëmijë, janë vrarë dhe katër të tjerë janë plagosur në pasditen e 1 janarit në Cetinje të Malit të Zi.
I dyshuari për vrasje të shumëfishtë dhe plagosje, Aco Martinoviq, ka tentuar të bëjë vetëvrasje dhe ka ndërruar jetë gjatë transportit për në spital.
Vrasjet kanë ndodhur në pesë lokacione të ndryshme – në lokacionin e parë dhe të dytë janë vrarë katër persona, në të tretin dy fëmijë, ndërsa në lokacionin e katërt dhe të pestë nga një person.
Siç raporton mediumi malazez “Vijesti”, ndër të vrarët është edhe motra e tij në Donji Kraj.
“80 plumba janë gjetur në xhepat e Aco Martinoviqit nga Cetinja, pas vdekjes së dyshuarit për vrasjen e 12 bashkëqytetarëve dhe plagosjen e katër të tjerëve, dje në Cetinje. Përveç municionit të gjetur në xhepat e tij, në karikatorin e pistoletës i janë gjetur edhe disa fishekë të kalibrit 9 mm”, mëson jozyrtarisht Vijesti.
Dje, pak pas orës 17:30, në tavernën “Velestovo”, afër Qendrës Sportive, Martinoviq ka vrarë katër persona. Pas kësaj, ai vrau katër persona të tjerë dhe plagosi një person në Bajice dhe më pas vrau dy fëmijë në vendbanimin Humci dhe më pas vrau motrën e tij dhe një person tjetër në Donji Kraji. Mes të vrarëve ishin tre gra dhe dy djem, dy vëllezër të moshës 10 dhe 13 vjeç, raporton ky medium.
Qeveria e Malit të Zi i ka shpallur tri ditë zie, më 2,3 dhe 4 janar, për shkak të këtij rasti./Express/
