Institucioni i Avokatit të Popullit organizoi një tryezë diskutimi kushtuar shëndetit mendor të fëmijëve, ku u prezantuan të gjeturat preliminare të raportit mbi përgjegjësitë e shtetit në mbrojtjen e të drejtave të fëmijëve.
Në këtë ngjarje, Avokati i Popullit, z. Naim Qelaj, theksoi se Kushtetuta dhe korniza ligjore e Kosovës përcaktojnë qartë përgjegjësitë e shtetit për mbrojtjen e të drejtave të fëmijëve. Megjithatë, ai nënvizoi sfidat ekzistuese në zbatimin e këtyre përgjegjësive, duke veçuar mungesën e mekanizmave sistematikë për identifikimin e hershëm të problemeve të shëndetit mendor te fëmijët dhe kufizimin e qasjes në mbështetje psikologjike të specializuar.
Një ndër çështjet e diskutuara ishte edhe numri i pamjaftueshëm i psikologëve në shkolla. Z. Qelaj tha se ky problem buron nga korniza aktuale ligjore, e cila përcakton numrin e psikologëve bazuar në numrin e nxënësve, duke lënë shumë fëmijë pa kujdesin e nevojshëm.
Gjithashtu, stigma dhe perceptimi negativ rreth shërbimeve psikologjike u identifikuan si barriera kryesore që pengojnë kërkimin e ndihmës profesionale. Për këtë arsye, u theksua domosdoshmëria e rritjes së vetëdijes tek prindërit dhe komuniteti për rëndësinë e shëndetit mendor.
Pjesëmarrësit, që përfaqësonin institucione të ndryshme, propozuan shtimin e burimeve për shëndetin mendor në nivel komunal, rritjen e kapaciteteve të psikologëve në shkolla, dhe zhvillimin e programeve për ndërhyrje të hershme.
Ky diskutim shërbeu si një thirrje për veprime konkrete nga institucionet përkatëse, duke synuar përmirësimin e shëndetit mendor të fëmijëve dhe mbrojtjen e mirëqenies së tyre në Kosovë.
