Nxënësit e SHFMU “Shaban Shala” shënuan Ditën Botërore të Shëndetit me aktivitete të ndryshme.
Grupi i nxënësve “Ekologët” të Shkollës së Mesme të Ulët “Shaban Shala” të udhëhequr nga drejtori i shkollës, Nysret Ismajli dhe arsimtarja e biologjisë, Edona Gashi, shënuan Ditën Botërore të Shëndetit me aktivitete të shumta duke vizituar institucione, ndërmarrje dhe duke shpërndarë fletushka në sheshin e qytetit me moton “Planeti Ynë, Shëndeti ynë”.
Në kuadër të aktiviteteve, nxënësit e SHFMU “Shaban Shala, u pritën në takim nga kryetari i Komunës, Shpejtim Bulliqi, ku shpalosën programin, moton dhe idetë e tyre për ndërgjegjësimin, sensibilizimin, sjelljen në nivel global të komunitetit për ruajtjen e shëndetit, nxënësit i ofruan kryetarit Bulliqi një dhuratë të punuar nga grupi i ekologëve me motive dhe mesazhe për shënimin e kësaj dite.
Kryetari Bulliqi, i lumtur nga vizita e grupit të ekologëve të rinj, i përgëzoi për punën dhe aktivitetin e shkëlqyer që ata po përcjellin tek komuniteti, duke u premtuar që do të jetë gjithmonë pranë tyre për përkrahje në moto të tilla, duke theksuar që shëndeti është e drejtë e secilit dhe jo privilegj, dhe se këtë të drejtë mund ta sigurojmë vetëm me angazhim dhe punë të përbashkët.
