Dje, në fshatin Orllan është mbajtur takimi publik me banorët e këtij fshati dhe fshatrave përreth, në kuadër të procesit të hartimit të Planit Zhvillimor Komunal 2026–2034. Në takim morën pjesë nënkryetarja e Komunës, Marigona Lahu, drejtorët Liridon Gashi, Bahri Selimi, Valbona Ibishi-Azemi dhe Fatlum Osmani poashtu në këtë takim morën pjesë përfaqësuesit nga kompania për hartimin e PZHK-së.
Gjatë takimit, u prezantua faza aktuale e punës dhe hapat e mëtejmë drejt përpilimit të këtij dokumenti strategjik. Pjesëmarrësit patën mundësinë të diskutojnë nga afër me përfaqësuesit komunalë dhe profesionistët e angazhuar, duke ndarë kërkesat dhe sugjerimet e tyre në lidhje me zhvillimin e zonës.
“Ky plan është një nga dokumentet më të rëndësishme për të ardhmen e komunës sonë, sepse përcakton drejtimet zhvillimore për vitet në vazhdim dhe krijon bazën për projekte konkrete që përmirësojnë jetën e qytetarëve,” u shpreh nënkryetarja Marigona Lahu, duke theksuar rëndësinë dhe kontributin e pjesëmarrjes së qytetarëve në këtë proces.
Takim tjetër do të mbahet sot për këtë çështje në fshatin Kërpimeh me banorët e kësaj zone, me synim që hartimi i dokumentit përfundimtar të reflektojë nevojat e qytetarëve përmes një procesi gjithëpërfshirës.
