Sërish sonte janë dëgjuar shpërthime në veri të Mitrovicës, saktësisht tek Lagjja e Boshnjakëve.
Dyshimet e para aluduan në një shpërthim – bombe, por këtë e ka demantuar Policia e Kosovës.
Zëvendësdrejtori i Policisë së Kosovës për rajonin e veriut të Mitrovicës, Besim Hoti, ka thënë se shpërthimet në veri të Kosovës nuk vinin nga mjetet shpërthyese.
Mirëpo, Demokracia.com ka mësuar se bazuar në informacionet e para bëhet fjalë për të ashtuquajturat shock-bomba.
Ka detonime të shock-bombave afër prokurorisë në Lagjen e Boshnjakëve. Një veturë është dëmtuar”, ka thënë një zyrtar i sigurisë për Demokracia.com.
Sipas tij, ka informata edhe për detonime në Kodrën e Minatorëve, por edhe për prezencë të grupeve të ndryshme me maska afër Urës së Ibrit, respektivisht te Dolce Vita dhe Fakulteti Teknik.
“Shumë qytetarë që jetojnë në Kodrën e Minatorëve janë të frikësuar dhe po kërkojnë të largohen nga atje. Ky si duket është edhe qëllimi, që duke shkaktuar frikë në lokalitetet me popullatë të përzier, të ndikojnë që ata të largohen”, thotë ky zyrtar i sigurisë për Demokracia.com.
Ministri i Punëve të Brendshme, Xhelal Sveçla, sot ka shkuar deri të Ura e Ibrit, por ai nuk ka kaluar në pjesën veriore të Mitrovicës. Sveçla para gazetarëve ka thënë se situata është nën kontroll, mirëpo informatat e fundit flasin ndryshe. /Demokracia.com/
