14 ditët e para të muajit Ramazan kanë shkuar, duke shënuar kështu ikjen e gjysmës së këtij muajit të shenjtë.
Besimtarët myslimanë kanë agjëruar këto ditë, duke u ndarë nga pija e ushqimi në kohën e syfyrit, ndërsa, iftarin e kanë çelur, pas perëndimit të diellit.
Një nga bukuritë e këtij muaji, padyshim që janë edhe ftesat për iftare, që bëhen nëpër shtëpitë e pritësve.
Mirëpo, ka vite që kjo metodë ka ndryshuar.
Tanimë, janë restorantet ato që po organizojnë meny për iftare, duke shërbyer ushqime të ndryshme, si hurma, llokume, ujë, mishra, brumëra e deri te ëmbëlsirat e kafetë.
Kjo metodë është pëlqyer nga qytetarët, duke u shëndrruar në traditë.
Mirëpo, këtë vit, nuk është pritur shumë fluks i madh i qytetarëve nëpër restorante, kjo për shkak të ngritjes së çmimeve të produkteve bazë ushqimore.
Madje, në menytë e restoranteve të shpërndara në rrjetet sociale, shihet se ka oferta të ndryshme, në restorante të ndryshme.
Syri.net Kosova, ka bërë një vëzhgim në kryeqytet, për t’i parë çmimet dhe fluksin e njerëzve, në kohë iftari.
Në restorantin Bagolina, në Aktash dhe rrugën Muharrem Fejza, menytë e iftareve kanë nisur nga çmimet 10,90 Euro.
Sipas menaxherit të këtij lokali, Muhamet Demi, restoranti nuk ka ndryshuar çmimet e menyve të këtij lloji.
Në një prononcim për Syri Kosova, ai tha se për ushqimet që ata ofrojnë, çmimet janë të njëjta me vitin e kaluar, për t’mos ua rënduar xhepin qytetarëve të Kosovës.
“Jo, çmimet nuk kanë lëvizur fare për menytë e iftareve, nëse e krahasojmë me vitin e kaluar, pra janë njëjtë. Ne ofrojmë ushqime si lloje të ndryshme të mishrave e sallatave, e deri te desertet, edhe pse ka pasur rritje te çmimeve të produkteve ushqimore, ne s’kemi menduar t’i ndryshojmë çmimet, që mos t’i rëndojmë agjëruesit” ka thënë ai.
Ndonëse shihej, Demi është pyetur edhe për fluksin e qytetarëve në këtë restorant, sa i përket rezervimeve për iftar dhe tha se ka më shumë rezervime deri më tani, se sa vitin e kaluar.
“Po, po ka rezervime, deri në këto ditë që flasim, ka më shumë se sa vitin e kaluar” përfundoi Demi.
Mirëpo, sa i përket restoranteve të tjera, inflacioni ka shkaktuar edhe një rritje të konsideruar të çmimeve për meny iftari.
Driton Hoti nga restoranti Hillstone, i tha Syrit se në krahasim me dy vitet e kaluara, rritja e çmimeve veç vërehet.
“Çmimet e menyve krahasuar me dy vitet e kaluara kanë rritje të konsiderueshme, duke pasur parasysh inflacionin që ka ndodhur në vend” tha ai.
Kurse, sa i përket daljes së agjëruesve në restorantin e tij për këtë vit, ai tha se është dalje e kënaqshme.
“Për dallim nga vitet e kaluara, vërehet një fluks më i vogël i qytetarëve për iftare, mirëpo, mund të them se dalja është e kënaqshme” përfundoi Hoti.
Sidoqoftë, për zonjën Remzie, qytetare, dalja në restorante nuk i pëlqen aspak, pasi, thotë se traditë e shqiptarit ka qenë qe mysafirin ta pres në shtëpi, e sidomos në muajin e Ramazanit, ku sipas saj, sevapi është i madh.
“Hiç valla s’po më pëlqen me dal me hanger ne restorante. Diqysh s’i m’i qit me hanger e mi përza. Te shpija kur vijshin mysafirt ka pas tjetër lezet, ju qitshe çka kishe, rrishin sa dojshin, bëjshim llaf shlirë. U gëzojshim kur vijke dikush për iftar, thojke nana është sevap me i jap bukë agjëruesit, me prit mirë, me i bo sajgi, e tash jo valla, tash një orë qatu në restorant, shtrenjt sa t’thush, s’di çka u ba kështu kjo kohë” përfundoi ajo.
Nga ana tjetër, Syri.net Kosova ditë më parë ka bërë edhe një krahasim të çmimeve të tri viteve të fundit, sa u përket iftareve, të cilat po i riilustrojmë prapë më poshtë:
Në vitin 2021, një ofertë për iftar, me ushqime thuajse të njëjta edhe me ofertat e 2022-ës dhe 2023-ës, ka kushtuar rreth 10 euro, në vitin 2022, 12.50 euro, kurse, këtë vit, një ofertë e tillë është rreth 15 euro. Pra, nëse shikojmë se çfarë ushqime ofrojnë, janë të përafërta./Syri.net
