Ish-kryeministri i Sllovenisë, Janez Jansha, ka publikuar në Twitter disa raportime gazetash për skandalin e madh financiar në të cilin dyshohet se është implikuar edhe ambasadori i Kosovës në Kroaci, Martin Berishaj.
Jansha tha se Qeveria e Sllovenisë po e kthen këtë shtet në faqet e para të gazetave jashtë vendit.
Jansha tha se nga muaji maj po presin për tri nënshkrimet që siç thotë ai, koalicioni qeverisës atje i ka premtuar për formimin e një komisioni hetimor për skandalin ku përfshihet kryeministri aktual i Sllovenisë, Robert Golob.
“Me sa duket, të gjitha parlamentet e Ballkanit do të krijojnë komisione hetimore për dyshimet për korrupsion në lidhje me kompaninë GENi, para Asamblesë Kombëtare Sllovene. Që nga muaji maj, ne kemi pritur më kot tre nënshkrimet e premtuara të koalicionit Sllovenia e Re”, ka thënë Jansha.
Në nëntor të vitit të kaluar Berishaj, gjatë raportimit në Komisionin Hetimor në Kuvendin e Kosovës i quajti shpifje të gjitha raportimet e mediave sllovene.
Së fundmi edhe një gazetë tjetër sllovene “Prava” raportoi për lidhjet e ambasadorit të Kosovës në Kroaci me kompaninë sllovene GEN. Sipas tyre, dyshohet se Berisha është paguar nga GEN-i, dhe se ai ka tërhequr 600 mijë euro para në vitet 2019 dhe 2020.
Ndërsa një hulumtim i Gazetës Online Reporteri.net, në maj të vitit të kaluar, kishe zbuluar se gati 2 milionë euro tjera, Berisha i kishte qarkulluar në biznesin e tij në Mal të Zi, në më pak se 5 vite – nga fundi i vitit 2016 deri në vitin 2020.
Raportimet e fundit nga gazeta Prava pretendojnë se Berishaj ka transferuar para edhe për fushatën e partisë se kryeministrit Albin Kurti, Lëvizjen Vetëvendosje.
Ministrja e Punëve të Jashtme të Kosovës, Donika Gërvalla, dy ditë më parë ka thënë sse nuk mund ta shkarkojë Berishajn sepse zyrtarisht nuk ka asnjë fakt se ai ka bërë ndonjë shkelje.
“Duhet të kemi mirëkuptim se ambasadori nuk shkarkohet për shkak të spekulimeve mediale, por për arsye faktike pse duhet të shkarkohet. Deri në këtë moment nuk kam asnjë informacion të vetëm që shkelje të tilla kanë ndodhur”, ka deklaruar Gërvalla ndër të tjera.
