Ylli i Kosovës Edon Zhegrova është duke u vëzhguar nga 10 klube të ndryshme, tre prej tyre në Angli, kështu ka deklaruar së paku menaxheri i njohur Mario Cenolli.
Cenolli në emisionin e “Euronews Albania” deklaroi se interesim për Zhegrovën kanë shprehur edhe klubet e mëdha si Arsenali e West Ham, derisa dihet që pëlqehet në Itali nga Juve e AC Milani.
“Besoj se ai do ta zgjedhë mundësinë më të mirë për karrierë. Ai ka mbi 10 oferta nga ekipet më të mira të Evropës dhe vetëm nga Anglia ka tre oferta. Dy prej tyre janë në La Liga, në Spanjë. Juventusi është i interesuar dhe Milani, klub të cilin e do që kur ishte fëmijë”.
“Newcastle ka bërë ofertë, Arsenali ka kërkuar informacione dhe është në radarin e tyre, ndërsa edhe West Ham ka bërë propozim”.
Canolli pastaj edhe e këshilloi lojtarin që të shkojë në Premierligë, ngase stili i lojës përshtatet për kampionatin anglez.
“Nuk mund të flasë në emrin e tij shkaku që ka një menaxher por mendoj se Premierliga do të ishte opsion i mirë, duke marrë parasysh karakteristikat e tij si lojtar”.
Ndërkohë, Lille do të kërkojë afro 20 milionë euro për ta lejuar Zhegrovën të largohet, kësisoj lehtësisht mund të bëhet futbollisti më i shtrenjtë shqiptar.
