Ministria e Financave ka procesuar sot pagesat me rritje për pensionistët.
Pagesat janë ekzekutuar për të gjithë pensionmarrësit e skemave pensionale, përfshirë të atyre të kategorive të luftës, tha ministri Hekuran Murati të mërkurën.
“Sot është procesuar pagesa e pensioneve që parashihen të paguhen në datën 15 të muajit”, ka thënë Murati.
Ministri i Financave, në një njoftim në Facebook, tha se pensione me rritje, sipas vendimit të fundit në mbledhjen e qeverisë, janë ekzekutuar për skemat e kategorive të luftës.
“E veçanta është se të gjithë pensionmarrësit e skemave të kategorive të luftës, sot e kanë marrë pensionin me rritje prej 20%, e për disa prej kategorive siç janë familjet e dëshmorëve dhe të zhdukurve të UÇK-së apo familjet e të vrarëve dhe të zhdukurve civilë rritja është edhe më e lartë”, tha Murati.
Në fund, ai e shfrytëzoi këtë rast që të bëjë fushatë për Lëvizjen Vetëvendosje, duke i kritikuar qeveritë e kaluara.
Murati tha se “pensionet për këto kategori nuk ishin rritur as në Qeverinë Mustafa (PDK-LDK) kur ministër i financave ishte Avdullah Hoti, e as në Qeverinë Haradinaj (PDK-AAK-Nisma) kur ministër i financave ishte Bedri Hamza”.
