Deputeti i Lëvizjes Vetëvendosje (LVV), Eman Rrahmani, ka deklaruar se nuk ka asnjë arsye për t’u larguar nga LVV-ja apo Grupi Parlamentar gjatë këtij mandati.
Rrahmani u shpreh i vendosur për të qëndruar besnik premtimeve të dhëna në fushatë dhe për të çuar deri në fund programin e qeverisjes.
“Unë po e them që kam qëndruar besnik asaj që kemi premtuar në fushatë, dhe për këtë nuk kam asnjë arsye që gjatë këtij mandati të largohem prej Lëvizjes Vetëvendosje, prej Grupit Parlamentar të VV-së, përderisa nuk shkojmë deri në fund të këtij programi gjatë këtij mandati qeverisës”, ka deklaruar Rrahmani.
Po ashtu, ai ka bërë të ditur se lëvizje brenda partisë Vetëvendosjes nuk ka.
Rrahmani, ka theksuar se do të qëndrojë besnik ndaj partisë dhe programit qeverisës gjatë këtij mandati.
Po ashtu, ai ka potencuar se qëndrimet e tij kanë qenë të pandryshuara që nga dita e parë në Vetëvendosje, duke shtuar se kjo nuk bëhet për përfitime politike apo elektorale.
Ai gjithashtu ka theksuar rëndësinë e lejimit të angazhimeve politike në vendet demokratike, duke përmendur se mbi dhjetë vende të BE-së nuk lejojnë martesat e gjinisë së njëjtë.
“Unë do të jem, dhe e kisha ndje si jo parimore nëqoftëse isha largu apo isha dorëzu para tentativave për ndryshimin qoftë edhe programit qeverisës kështu që në këtë pikë e ndjejë vetën jashtëzakonisht komod. Këtë nuk e bej as për përftime politike as elektorale. Këto kanë qenë qëndrimet e mija prej ditës parë kur kam shkruar në Vetëvendosje. Vazhdojnë me qëndru për shkak se besoj në këto vlera. Bile do të ishte shumë problem pengimi apo moslejimi i angazhimeve të tilla politike, për shkak se në secilin vend demokratik janë diku mbi dhjetë vende të BE-së që nuk i lejojnë martesat e gjinisë së njëjtë”, ka deklaruar mes tjerash ai.
