Emisari i SHBA-së për rajonin dhe për dialogun Kosovë-Serbi, Gabriel Escobar, i cili së shpejti do të marrë një angazhim tjetër në kuadër të diplomacisë amerikane, në një intervistë për Atlantic Council ka folur për raportin në mes të SHBA-së dhe Kosovës.
Escobar ka thënë se në të kaluarën raporti i SHBA-së dhe Kosovës ka qenë më i mirë dhe e ka cilësuar si një raport sfidues. Diplomati amerikan ka thënë se SHBA mbetet e përkushtuar për pavarësinë, integritetin territorial e sigurinë e Kosovës dhe një gjë e tillë s’do të ndryshojë kurrë.
Gjithashtu ka thënë se SHBA ka një lidhje tepër të thellë me popullin e Kosovës dhe se SHBA-ja mbetet një shtet shumë pro-Kosovës. Escobar ka thënë se kudo që udhëton e ka ndjenjën reciproke që populli i Kosovës janë pro-amerikan. Diplomati amerikan thotë se kjo i jep një forcë dhe stabilitet raportit, megjithatë shton se s’është sekret që raporti mes dy vendeve ka pasur sfida.
Këtu Escobar përmend të pasurit një vizion të përbashkët për rajonin dhe për atë se si mund të avancohet projekti kombëtar i Kosovës. Ai tutje ka shtuar se shpreson që do të vazhdohet përmirësimi i raportit në mes të SHBA-së dhe Kosovës dhe thotë se jo vetëm SHBA, por edhe nga i gjithë QUINT ka vetëm vullnet të mirë për të përmirësuar raportin me Kosovën.
