Ministri në detyrë, Faton Peci, është deklaruar për media pas dështimit të 16-të të kuvendit.
Peci është shprehur se janë duke bërë përpjekje për të zhbllokuar situatën dhe që sipas tij janë bërë të gjitha përpjekjet.
“Në vazhdimësi jemi duke bërë përpjekje për zhbllokimin e kësaj situate. Është shumë e rëndësishme të potencohet se, meqë sot ka përfolje rreth emrit, ne ende nuk kemi ardhë te propozimi i një emri. Ne kemi vlerësuar që vullneti i njëmendtë dhe ndërgjegjja që mund të thirret te secili deputet mund të ndihmojë në zhbllokimin e situatës.
Ne i kemi bërë të gjitha përpjekjet. Pikat e rendit të ditës janë të percaktuara, përveç se ka ndryshu modaliteti nga votimi i hapur në votim të fshehtë. Tjetra, në momentin që kryeministri në detyrë ka bërë ftesat për takim, synimi ka qenë për dakordim për zhbllokim, me votimin e emrit të kryetarit emrat e nënkryetarëve. Epilogu i këtij takimi dihet: kryetari i PSK-së mori pjesë në takim, ai i LDK-së jo”, ka thënë Peci, shkruan IndeksOnline.
Ndërsa për takimin me presidenten, Peci është shprehur se shpreson të arrihet zgjedhja.
“Nuk mund të flas për pritshmëritë e takimit me presidenten sepse niveli varet nga ecuria e diskutimeve. Andaj s’mund të paragjykoj se cili do të jetë epilogu. Por shpresoj të arrihet zgjidhja.
Emri i Albulena Haxhiut nuk është shkaktari i kësaj situate. Vetëvendosjes i takon propozimi.”, tha Peci.
