Mëngjesin e sotëm TV Llapi ka raportuar rreth emërimit të ri në Komunën e Podujevës. Bëhet fjalë për Drejtoreshën e Bujqësisë, Pylltarisë dhe Zhvillimit Rrural në Podujevë, Lirie Hoti.
Ky emërim ka ngritur dyshime për një koalicion mes LVV-së dhe AAK-së në Podujevë, ngaqë pos fotos së kryetarit me tashmë Drejtoreshën Hoti, nga asambleistët e AAK-së ne Podujevë, është ndarë foto po nga zyra e kryetarit, ku në foto shihen Burim Hasani dhe Arbnor Fazliu krah kryetarit Bulliqi, shefes së kabinetit dhe drejtoreshës së re.
Hasani dhe Fazliu në foton e postuar kanë shtuar simbolin e shtrëngimit të duarve.
Por, a ka shtrëngim duarsh mes LVV-së dhe AAK-së?
TV Llapi ka kontaktuar me Fazliun i cili e ka konfirmuar se ka marrëveshje mes të dy palëve.
“Po, ka marrëveshje. Kemi qenë në negociata dhe sot është finalizuar.”
Ndërkaq, kur është pyetur në lidhje me atë se kush është pjesë e marrëveshjes, Fazliu ka thënë se pjesë e negociatave ka qenë kryetari i Degës së AAK-së në Podujevë, Baki Feta, bashkë me asambleistët nga radhët e AAK-së, pa përfshirë Mrika Thacin.
Fazliu poashtu bëri te ditur se Besnik Tahiri, kandidati për kryetar të Podujevës nga radhët e AAK-së në zgjedhjet e fundit lokale nuk ka qenë pjesë e marrëveshjes, mirëpo është në dijeni për këtë dhe as nuk e kundërshton,as nuk e pranon.
Deri më tash, nuk ka pasur ndonjë reagim nga ana e Tahirit.
