ADVERTISEMENT
Nxënësit e Shkollës Fillore “Kongresi i Manastirit” në fshatin Gllamnik do të kenë një vend modern për t’i zhvilluar aktivitetet sportive. Aty sot është vendosur gurthemeli për ndërtimin e sallës së sporteve për nevojat e kësaj shkolle.
Kryetari i Komunës, Shpejtim Bulliqi, u shpreh i lumtur që po e nisin edhe këtë projekt të ri, ku nxënësve po u krijohen hapësira të përshtatshme për ta zhvilluar talentin e tyre në sport.
Salla e sporteve në Gllamnik në vlerë prej 385 mijë eurove realizohet në bashkëfinancim
mes Komunës dhe Ministrisë së Zhvillimit Rajonal, ku 135 mijë do t’i investojë Komuna dhe 250 mijë euro Ministria.
Zëvendësministri i Zhvillimit Rajonal, Ali Tafarshiku, foli për bashkëpunimin e mirë që kanë me Komunën e Podujevës në realizimin e shumë projekteve, duke shtuar se vetëm për këto dy vjet ky është projekti i tretë që e realizojnë në bashkëfinancim me Komunën.
Në ceremoninë e vendosjes së gurthemelit të sallës së sporteve morën pjesë edhe nënkryetarja e Komunës, Marigona Lahu, drejtori për Arsim Avni Fetahu, drejtorë e zyrtarë tjerë komunalë, zyrtarë nga Ministria e Zhvillimit Rajonal, nxënës, mësimdhënës dhe banorë të kësaj ane.
