Ish-komandanti i parë i KFOR-it në Kosovë, Erhard Buhler ka komentuar situatën e fundit të krijuar në Kosovë, veçmas në Veri. Gjenerali gjerman ka kërkuar veprime të matura nga institucionet.
Buhler për Indeksonline ka thënë se nuk është interes i Kosovës që situata të përshkallëzohet dhe se Kosova ka çështje më të rëndësishme për të zgjidhur, se sa problemin me targat.
“E kam thënë edhe edhe në verën e këtij viti se nuk rekomandoj masa reciproke. Nuk mund të jetë në interes të Republikës së Kosovës apo shteteve të tjera të Ballkanit Perëndimor që situata të përshkallëzohet për probleme që në thelb janë të vogla. Pikë pamja ime nuk ka ndryshuar nga ajo që kam thënë herën e fundit, përkundrazi është përforcuar. Kosova dhe Serbia kanë probleme më të rëndësishmë për qytetarët, se sa targat. Sistemi i shëndetësisë publike, sistemi i arsimit, furnizimi me energji, papunësia, shërbimet komunale, luftimi i korrupsionit, janë më të rëndësishme për qytetarët e Kosovës, se sa çështja e targave. Në rastin e Kosovës, liberalizimi i vizave më në fund është afër dhe pyetja ime shtrohet se a është çështja e targave kaq e rëndësishme sa ky proces duhet të rrezikohet tani?” ka thënë Buhler për Indeksonline.
Gjenerali i NATO-s ka thënë se Vuçiq po luan rol të madh tek pala serbe dhe se vendosja e ushtrisë në kufi me Kosovën ështëë në kundërshtim me vlerat evropiane. “Roli i politikanëve serbë, sidomos i Vuçiq tek pala serbe është i madh. Vendosja e ushtrisë serbe në kufirin me Kosovën në mosmarrëveshjen për targat e automjeteve është po aq në kundërshtim me vlerat evropiane sa edhe retorika e vazhdueshme luftarake e presidentit dhe ministrit të tij të mbrojtjes” ka thënë Buhler.
Ish-komandanti i KFOR-it në Kosovë ka thënë se shumica dërmuese e qytetarëve të grupeve etnike në Kosovë duan që të jetojnë në paqe, prandaj duhet votuar njerëzit që sjellin paqen e sigurinë. “Shumica e qytetarëve të të gjitha grupeve etnike në Kosovë si dhe qytetarëve në Serbi duan që të jetojnë në paqe, prosperitet dhe me siguri. Prandaj është mirë që më në fund po diskutohet një dokument themelor që synon të rregullojë marrëdhëniet mes dy shteteve. Votuesve të qytetarëve të Ballkanit Përëndimor u kërkohet që të zgjedhin figura politike që janë të afta për pajtim, ata që zbardhin problemet dhe jo ata që marrin vendime të prapambetura. Pavarësia e Kosovës dhe mbrojtja e kësaj pavarësie nuk janë më temë diskutimi” ka thënë Erhard Buhler./Indeksonline/
