Lindja e një foshnje përcillet me ngrohtësi, dashuri e lot gëzimi. Por, jo pak raste janë shënuar në Kosovë, kur në momentin e ardhjes në jetë të fëmijëve, prindërit për arsye të ndryshme, fatkeqësisht iu kanë kthyer shpinën atyre, duke i braktisur në dhomat e Klinikave dhe duke i lënë në dorë të fatit, shkruan Gazeta Sinjali.
Kjo dukuri e braktisjes së fëmijëve vazhdon të jetë ende fenomen shqetësues në vendin tonë.
Për këtë rast Gazeta Sinjali, ka kontaktuar me drejtoreshën e Klinikës së Neonatologjisë, Hajrije Ismaili.
E njëjta, ka thënë se në këtë klinikë, kushtet për foshnjat e braktisura janë të mira dhe se kujdesi është maksimal. Derisa ka treguar se vitin që lamë pas, vetëm një çift ka shprehur interesim për birësim.
“Në Klinikën tonë, kushtet janë të mira për foshnjat e braktisura dhe kujdesi është maksimal. Gjatë qëndrimit në Klinikën e Neonatologjisë vitin e kaluar vetëm një çift ka shprehur interesim për birësim”, ka thënë ajo.
Kurse, sa i përket gjendjes në tri vitet e fundit, nga të dhënat e kësaj Klinike vërehet se ka ulje të shifrave, në vitin 2020 kanë qenë 19 foshnje të braktisura, në vitin 2021, 8 fëmijë, derisa në vitin 2022 numri ka rënë në 7.
“Në vitin 2020 gjithsej 39, prej tyre 19 të braktisur, 20 ribashkim familjar me një ose dy prindër. Në vitin 2021 gjithsej 37, fëmijë të braktisur 8 dhe 29 ribashkim familjar. Kurse, në vitin 2022 gjithsej 40, prej tyre 7 të braktisur, 33 ribashkim familjar me një ose dy prindër”, ka deklaruar ajo për Gazetën Sinjali.
Sa i përket rasteve kur nënat e reja braktisin fëmijët dhe ikin pa paralajmërim nga Klinika, Ismaili është shprehur se nuk kanë evidentuar raste të tilla.
“Nuk kemi te evidentuara raste të nënave të këtyre foshnjave të cilat kanë lëvizur nga klinika pa paralajmërim. Ndërkohë që skemat sociale janë duke punuar intensivisht në ndihmë të fëmijëve të braktisur”, ka thënë ajo.
Ndryshe, përmes kampanjave të ndryshme vetëdijesuese bëhet thirrje për mosbraktisje të fëmijëve.
