Në Samitin BE-Ballkani Perëndimor që po mbahet në Tiranë kanë arritur edhe dy udhëheqësit europianë, kancelari gjerman Olaf Scholz dhe presidenti francez Emmanuel Macron.
Kancelari gjerman nuk u ndal për deklaratë në media, veçse përshëndeti nikoqirin Edi Rama.
Ndërsa, presidenti i Francës, Emmanuel Macron foli para mediave për një sërë çështjesh të rëndësishme. Lideri francez tha se është i lumtur që ndodhet në Shqipëri dhe se kanë projekte konkrete për të diskutuar.
“Lufta në Ukrainë është çështje sigurie për të gjithë rajonin. Ne jemi duke punuar që nga marsi. Jam i lumtur që sot jam në Shqipëri, falënderoj kryeministrin Rama për këtë samit të rëndësishëm. Në kuadër të presidencës çeke kemi projekte konkret për të diskutuar.
E rëndësishme të kemi projekte konkrete për energjinë dhe procesin e integrimit. E rëndësishme të punohet drejt një solidariteti të mëtejshëm. Do të kemi mundësi të përgatisim konkluzione për energjinë.“
Sa i përket vizitës në Tiranë, Presidenti francez u shpreh se do të rikthehet.
“Jemi shumë krenarë dhe të lumtur që gjendemi këtu. Miku im i mirë më ka ftuar disa herë jam këtu por do të kthehem për një takim dypalësh”.
Duke thënë se mban mot i mirë sot në Tiranë, Macron refuzoi të përgjigjet në disa pyetje që lidheshin me Kosovën.
