Po bëhen katër orë që kur ka nisur takimi në ora 10:00, i Kryeministrit të Kosovës, Albin Kurti dhe Presidentit të Serbisë, Aleksandër Vuçiq me shefin e diplomacisë evropiane, Josep Borrell.
Ky takim urgjent mes kryeministrit të Kosovës, Albin Kurti dhe presidentit serb, Aleksandër Vuçiq, u ndërmjetësua nga shefi i diplomacisë Josep Borrell, dhe emisari i BE-së për dialogun, Miroslav Lajçak.
Para takimit trepalësh, Borell e Lajçak herët paradite patën takime të ndara me Kryeministrin e Kosovës, Albin Kurti si dhe me Presidentin e Serbisë, Aleksandër Vuçiq.
Shefi i diplomacisë evropiane, Josep Borell, pritet që pas takimit të dalë në konferencë për media për të shpjeguar ecurinë e bisedimeve mes palëve.
Borrell tha mbrëmë se e ka thirrur këtë “takim urgjent”, për shkak të nevojës për të shtensionuar situatën.
“T’i japim fund menaxhimit të krizave të vazhdueshme dhe në vend të kësaj të fillojmë të përparojmë drejt normalizimit të marrëdhënieve”, shkroi Borrell në Twitter.
Shefi i diplomacisë evropiane, javën e kaluar tha kategorikisht se “nuk mund të hyjmë në 21 nëntor” pa arritur një marrëveshje për targat.
Në anën tjetër, Presidenti i Serbisë, Aleksandër Vuçiq, ka thënë se nuk pret rezultat nga takimi trilateral BE-Kosovë-Serbi, po se ka shkuar “vetëm për t’ju dhënë arsye se Serbia nuk dëshiron zgjidhje”.
Ndërsa, Policia e Kosovës njoftoi të dielën se masa për gjobat prej 150 euro për veturat ilegale do të shtyhet për një ditë, pra do të nis zbatimi të martën e 22 nëntorit.
