Kryetari i Partisë Demokratike të Kosovës, Memli Krasniqi, sot në një konferencë për media ka mirëpritur anëtarin më të ri të partisë, ish-komandantin e Forcës së Sigurisë së Kosovës, Rrahman Ramën.
Krasniqi tha se Rama është patriot i dëshmuar, i cili është i shquar për kontributin e tij shumëvjeçar për vendin kudo dhe kurdo që e ka kërkuar nevoja.
Gjenerallejtënant Rrahman Rama, ka një jetë kushtuar përpjekjeve për çlirim dhe shtet ndërtim. Komandant i Ushtrisë Çlirimtare të Kosovës në zonën operative të Shalës më 1998-99. Komandant i TMK-së pas luftës në Kosovë. Nga viti 2015 deri në vitin 2021 ishte Komandant i Forcës së Sigurisë së Kosovës nën lidershipin e të cilit kjo forcë gëzoi ditët e saj më të mira. Një komandant që ndërtoi ura të fuqishme bashkëpunimi në shërbim të forcimit të ushtrisë tonë me të gjithë akterët ndërkombëtarë, posaçërisht ShBA-të”, tha Krasniqi.
Ndërkaq, Rrahman Rama tha se misioni jetësor dhe krenaria e tij më e madhe është shërbimi ndaj Kosovës. Ai theksoi se qëllimi i tij kryesor është që t’i shërbejë vendit.
“Qëllimi i bashkimit tim me Partinë Demokratike është shumë i thjeshtë, PDK-ja është parti shtet formuese e shtet ndërtuese, pavarësisht situatës në të cilën është sot, unë e mendoj se do të japim kontributin dhe do të kalojmë këto sfida. Qëllimi im është që t’i kalojmë këto sfida që i ka vendi. Do t’i shërbej këtij vendi dhe me këtë ideal do të vazhdojmë”, tha ai.
