Gjykata Themelore e Gjakovës ka aprovuar kërkesën e Prokurorisë Themelore të Gjakovës për caktimin masës së paraburgimit prej 1 muaji ndaj aktivistit të Lëvizjes Vetëvendoaje Gerolld Nikoloqi për dhunë në familje dhe për lëndim të lehtë trupor që dyshohet se i ka shkaktuar bashkëshortes së tij.
Zëdhënësi i Gjykatës Themelore në Gjakovë Lekë Muqaj, tha për Gazetën Sinjali se GjThGj-ja i ka caktuar masën e paraburgimit prej 1 muaji të pandehurit G. N për dy vepra penale: dhunë në familje dhe për lëndim të lehtë trupor.
Gazeta Sinjali ka raportuar për dhunën e ushruar nga aktivisti i Lëvizjes Vetëvendosje, Gerolld Nikoliqi ndaj bashkëshortes së tij.
Nikoliqi i cili si fotograf tash është pjesë e kabinetit të kryeparlamentarit, Glauk Konjufca, dyshohet se ka keqtrajtuar psiqikisht dhe fizikisht në mënyrë sistematike bashkëshorten e tij.
Rastin për Gazetën Sinjali e ka konfirmuar zëdhënësi i Policisë së Kosovës për Rajonin e Gjakovës, Sheremet Elezaj, i cili njoftoi se i dyshuari është dërguar në mbajtje për 48 orë.
“Me datën 22.12.2022 është arrestuar personi mashkull i lindur në vitin 1987 mbi dyshimin se kishte ushtruar dhunë ndaj bashkëshortes së tij. Rasti ka ndodhur në rrugën “Mark Malota” në Gjakovë Me vendim të Prokurorit të Shtetit i dyshuari është ndalur në mbajtje”, tha Elezaj.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
