Gjykata Themelore në Lipjan ka vendosur të caktojë masën e paraburgimit për pesë zyrtarët policorë të dyshuar për përfshirje në vdekjen e Agon Zejnullahut, e cila ndodhi të hënën në mëngjes në qytetin e Lipjanit.
Pamjet e arrestimit shfaqën mënyrën brutale të arrestimit të tij, ku pjesëtarë të Policisë së Kosovës i vendosën gjunjët në qafë.
Pas publikimit të pamjeve të ngjarjes dhe reagimeve të forta, të pesë zyrtarët policorë u ndaluan nën akuzën për veprën penale të dyshuar “vrasje nga pakujdesia”.
Prokuroria paraqiti kërkesë për paraburgim ndaj rreshterit Ibrahim Nela dhe katër zyrtarëve të tjerë: Albian Retkoceri, Artidon Konxheli, Liridon Rrahmani dhe Endrit Beqiri. Ata dyshohen për veprën penale “vrasje nga pakujdesia” në rrethana të bashkëkryerjes, raportoi “Bekimi për Drejtësi”.
