Të hënën e 27 tetorit, Kryeministri në detyrë, Albin Kurti ka shkarkuar nga detyra zëvendësministrin për Zhvillim Rajonal, Elldin Ugllar, anëtar i partisë SDU, që udhëhiqet nga deputetja Duda Balje.
Në vendimin e lëshuar për shkarkimin e Ugllar, thuhet se i njëjti “obligohet të bëjë deklarimin e pasurisë në përputhje me ligjin për kontrollin e pasurisë dhe dhuratave”.
Krahas tij, nga dokumenti që po qarkullon në media, nga pozita e këshilltarit politik është shkarkuar edhe Enes Sulejmanoviç, gjithashtu pjesë e SDU-së.
Këto shkarkime, udhëheqësja e kësaj partie i ka cilësuar si hakmarrje. Sipas saj ky është veç një vazhdim i hakmarrjes ndaj saj.
“Hakmarrja nuk ka nisur, veç ka vazhduar”, ka shkruar shkurt Duda Balje.
Javën e kaluar, Duda Balje bëri të ditur se nuk kishte pasur asnjë thirrje apo takim me Kurtin lidhur me formimin e qeverisë së re.
Ajo disa herë pati përsëritur se nuk ka votë për qeverinë Kurti pa plotësimin e kërkesës për formimin e një komune boshnjake.
