Zëdhënësja e Lidhjes Demokratike të Kosovës, Sibel Halimi, ka thënë se komenti i ministres Albulena Haxhiu, e cila iu drejtua prokurorit në aktakuzën për gazin lotsjellës me thirrjen “dorëzohu”, shpërfaq qasjen e dhunshme të qeverisjes aktuale në Kosovë.
Halimi tha se mendësia e gazit lotsjellës ekziston akoma te partia në pushtet siç ekzistonte sa ishte në opozitë, por se tash, sipas saj, është përkthyer në kërcënim, shkruan Gazeta Online Reporteri.net.
“Mendësia e gazit lotsjellës vazhdon edhe në qeverisje, por tashti shndërrohet në kërcënim, si reflektim i qasjes së dhunshme. Gjuha, komunikimi përfaqëson e përcakton atë çfarë jemi dhe mendojmë. Prandaj, nuk pritet që të qeveriset përtej mënyrës se si Vetëvendosje erdhi në pushtet”, shkroi ajo në Facebook.
Ajo tha se, me këtë koment, Haxhiu ka tentuar të ndërhyjë në drejtësi.
“Ministrja e Drejtësisë i drejtohet prokurorit me fjalët “dorëzohu, s’është vonë”!? Duke ndërhy paskrupullt në pushtetin e ndarë. Kjo është qasje e rrezikshme dhe shpërfaq mendësinë e gazit lotsjellës në qeverisje duke u përkthyer në arrogancë e mos respektim të shtetit”.
“Kjo është dhunë simbolike e pushtetit autoritar”, tha Halimi.
Ministrja e Drejtësisë, Albulena Haxhiu, i ka bërë thirrje prokurorit Ilaz Beqiri që të dorëzohet dhe të tërhiqet nga aktakuza pasi mungon ekspertiza dhe faktet për gazin lotsjellës.
Thirrja e Haxhiut drejtuar prokurorit është bërë të premten në seancën gjyqësore ku ajo bashkë me deputetin Pal Lekaj dhe ish-deputetet Donika Kadaj-Bujupi e Besa Baftiu akuzohen se më 19 shkurt 2016 kanë poseduar jashtëligjshëm në Parlament nga një bombol të gazit.
“Prandaj, ndonëse pas 7 vitesh i kërkoj prokurorit që të dorëzohet, të tërhiqet nga aktakuza. Nuk është vonë asnjëherë për të bërë një veprim te tillë”, ka deklaruar Haxhiu.
