Kryetari i AAK-së, Ramush Haradinaj, sot, në 74-vjetorin e Deklaratës Universale për të Drejtat e Njeriut, u shpreh se “kujtojmë një ndër veprat më madhore të njerëzimit.”.
Haradinaj potencoi se Kosova u ndërtua nga hiri i mohimit të të drejtave të njeriut, padrejtësi, të cilat do të mbeten në histori sa të ekzistojë njerëzimi.
“Gratë dhe burrat që çdo ditë luftuan dhe luftojnë për të drejtat e njeriut janë ndërgjegja e popujve. Këto padrejtësi na kujtojnë më së miri NATO-n në krye me miqtë tanë ShBA-të, të cilët dënuan shkeljen e të drejtave ndaj shqiptarëve. Janë ata të cilët u kujdesën që këtë deklaratë ne sot ta mishërojmë në Kushtetutë.”, shkroi Haradinaj në Facebook.
Ndryshe, data 10 dhjetor është shpallur Dita Ndërkombëtare e të Drejtave të Njeriut në përkujtim të Deklaratës Universale për të Drejtat e Njeriut, e miratuar më 10 dhjetor 1948 nga Asambleja e Përgjithshme e Kombeve të Bashkuara. Pas këtij akti historik, Asambleja kishte ftuar të gjitha shtetet anëtare që ta shpallin tekstin e Deklaratës dhe të përpiqeshin që të përhapej, paraqitej, lexohej dhe të shpjegohej, sidomos në shkolla dhe institucione të tjera edukuese, në të gjitha vendet dhe shtetet pa marrë parasysh statusin e tyre politik.
