Kryetari i AAK-së, Ramush Haradinaj ka nderuar të vrarët e masakrave në Qyshk, Zahaq, Pavlan e Llabjan.
Përmes një postimi në Facebook, Haradinaj kujtoi 102 shqiptarët e paarmatosur që u ekzekutuan pa mëshirë nga njësitet ushtarake e policore të shtetit serb, si hakmarrje ndaj humbjeve që po pësonin në frontet e luftës, transmeton Klankosova.tv.
Ndër të tjera, ai nderoi edhe eprorët e luftëtarët e Ushtrisë Çlirimtare të Kosovës nga kjo anë e Dukagjinit, të rënë në beteja të ndryshme për liri: Skender Çekun nga Qyshku; Jahë Kabashin, Blerim e Bekim Kelmendin, si dhe Rifat Veselin nga Llabjani.
“Këto masakra janë dëshmi e rrugës së rëndë që kaloi Kosova deri te liria, por edhe e sakrificës së madhe të njerëzve tanë që nuk u përkulën kurrë përballë armikut. I përjetshëm kujtimi për të gjithë të rënët për liri”, ka shkruar ai.
