Ambasadori amerikan në Serbi, Christopher Hill, ka thënë se tejkalimi i mosmarrëveshjes për targa nuk do të kontribuojë në zgjidhjen e çështjeve kyçe mes Kosovës dhe Serbisë.
Ambasadori amerikan i është përgjigjur gazetarëve në një pritje që organizoi për një delegacion të biznesmenëve amerikanë që kanë vizituar Serbinë, raporton “Radio Televizioni i Vojvodinës”.
Hill ka thënë se çështje kyçe janë anëtarësimi i Kosovës në organizata ndërkombëtare dhe e ardhmja e komunitetit serb në Kosovë.
“Serbia ka të drejtë të pyesë se çfarë do të ndodhë me serbët në Kosovë, a mund të ndihen rehat serbët në Kosovë, a mund të ndiejnë mbështetjen dhe mbrojtjen e ligjit, a mund ta ruajnë identitetin e tyre. Këto çështje janë me rëndësi kyçe, në kuptimin që çështja e Kosovës do të ndërkombëtarizohet dhe komuniteti serb nuk do të harrohet”, tha Hill. “Në vend të kësaj ne po sillemi rreth çështjes së targave. Sido që të përfundojë kjo çështje, nuk mendoj se do të zgjidhë shqetësimet kryesore të dyja palëve – anëtarësimin e Kosovës në organizatat ndërkombëtare dhe çështjen e së ardhmes së komunitetit serb në Kosovë. Targat nuk do ta zgjidhin këtë”.
Hill ka thënë se Bashkimi Evropian ka punuar për një kohë të gjatë për këtë çështje. Ai ka thënë se në dialogun e lehtësuar nga BE-ja, Kosova dhe Serbia duhet të bashkëpunojnë e të zgjidhin çështjet e hapura.
“Ne duam dialog për të zgjidhur çështjet e mëdha, e jo që dialogu të kthehet në zgjidhje të mosmarrëveshjeve”, ka thënë Hill.
