Deputeti i Lidhjes Demokratike të Kosovës, Avdullah Hoti, ka thënë se vizita e sotme e Lumir Abdixhikut në DASh ka qenë e planifikuar tash e sa kohë.
Sipas tij, në Departamentin Amerikan të Shtetit, gjërat nuk ndodhin rastësisht, shkruan Gazeta Online Reporteri.net.
“Si vizitë ka qenë e planifikuar ka një kohë, por vetëm koincidencë nuk është, Në DASH nuk ndodhin gjërat me koincidencë, nuk ndodh që rastësisht paska ra kjo datë e vizitës sepse ka pas mundësi që kjo vizitë me u spostu, sic janë spostu vizitat e ministrave të qeverisë, koincidencë nuk është”, deklaroi Hoti në T7.
Ai tutje tha se takime si këto janë sinjale që ShBA e sheh LDK’në si partner të rëndësishëm në politikë në Kosovë.
“Janë takime normale, dhe më vjen shumë mirë që lidershipi i LDK’së pritet në DASH, sepse këto janë sinjale që e ke besueshmërinë e partnerit tonë kryesorë, na shohin si partnerë të rëndësishëm politikë në Kosovë”, tha ai.
Këtë, Hoti e ka quajtur si një gjë të mirë për Kosovën.
“Kjo është e mirë edhe për Kosovën, pasi në Kosovë ka parti të përgjegjshme që kanë besueshmërinë e partnerëve tanë ndërkombëtarë që e kryn punën mirë sa janë në opozitë dhe që bëhen gati për të marrë përgjegjësi shtetërore”. /Reporteri.net/.
