Identifikohet gruaja që u gjet pa shenja jete në Prishtinë – Mjekët konstatuan shenja dhune, dyshohet për vdekje të dyshimtë
Një ngjarje e rëndë është regjistruar në orët e para të së hënës në kryeqytet, ku një grua u gjet pa ndjenja në një nga rrugët e qendrës së Prishtinës dhe më pas ndërroi jetë në QKUK.
Sinjali mëson ekskluzivisht se viktima është Diana Quni, 27 vjeçare nga Gjakova, e cila jetonte e vetme në një banesë afër vendit ku u gjet trupi i saj.
Burimet e Sinjalit bëjnë me dije se rreth orës 01:30 të datës 16 qershor 2025, punonjësi i sigurimit A.Sh., 50 vjeçar, gjatë ndërrimit të tij kishte vërejtur një person të shtrirë në tokë në rrugën “Ferid Curri”. Ai kishte njoftuar menjëherë patrullën policore më të afërt.
Policia kishte thirrur emergjencën, e cila pas mbërritjes në vendngjarje kishte konstatuar se gruaja kishte shenja jete, por gjatë trajtimit në QKUK mjekët kishin vërejtur edhe shenja të dhunës fizike. Pavarësisht përpjekjeve mjekësore, rreth një orë më vonë ajo ndërroi jetë.
Në vendin e ngjarjes kanë dalë hetuesit policor, Njësia Rajonale e Hetimeve, Forenzika Rajonale dhe Prokurori Kujdestar për Krime të Rënda, me ç’rast është inicuar rasti “Hetim mbi vdekjen”, ndërsa trupi i pajetë është dërguar në Institutin e Mjekësisë Ligjore për autopsi.
Gjatë hetimeve, policia ka arritur të identifikojë viktimën si Diana Quni nga Gjakova, dhe më pas ka lokalizuar banesën ku ajo kishte jetuar, vetëm disa metra larg vendit ku u gjet pa ndjenja. Banesa është hapur në prani të prokurorit të shtetit dhe është ekzaminuar nga krim-teknika, ku janë gjetur dokumentet identifikuese të viktimës, por nuk është hasur ndonjë send i dyshimtë që lidhet me rastin.
Obduksioni tashmë është përfunduar në IML dhe familjarët e viktimës janë njoftuar për ngjarjen tragjike.
Hetimet për zbardhjen e rrethanave të plota të vdekjes së saj po vazhdojnë.
Sinjali do të qëndrojë pranë këtij rasti dhe do t’ju mbajë të informuar me detaje të reja./Sinjali
