Imami i Xhamisë së Bellopojës në Podujevë, Kujtim Hyseni ka thënë se një grup i personave po tentojnë ta sulmojnë.
Në një përgjigje për Shqip.com imami Hyseni tha se i ka parë disa lëvizje të mobilizimit të këtij grupi.
“Unë pres një tentim për sulm ndaj meje prej tyre sepse veçse i kam parë do lëvizje që janë duke u mobilizu dhe duke thirrë shokë prej vendeve tjera. Janë disa grupe në Prishtinë që veprojnë dhe janë disa tjerë prej Maqedonisë e ka kështu rreth e rreth Prishtinës”, tha Hyseni.
Por, personat në fjalë sipas imamit Hyseni janë të afërt me organizatën terroriste ISIS.
“Është një çerdhe e ISIS-it edhe pse tash vërehet një heshtje e ISIS-it. E shihni që ISIS-i nuk është më në skenë, por janë duke vepruar kështu me grupacione. Nëse hyjmë në detaje, në kohën e ISIS-it ka pasur çerdhe këtu ku jam imam unë, e me ardhjen time si imam iu ka prishur çerdhja dhe iu pengon”.
Hyseni thotë se ky grup i njerëzve që planifikojnë sulmin ndaj tij, ka mbështetje të disa hoxhollarëve që janë me ideologji të Lindjes së Mesme.
“Fillimisht ka reaguar një djalë që është në një farë forme në grupin e tyre, por i kanë këta disa hoxhallarë që marrin mbështetje. Ata kanë edhe persona nga Belgjika dhe Gjermania që i furnizojnë me të holla, ata persona në këto vende kanë direktiva prej Lindjes së Mesme. Kushdo qoftë ai person që po i dirigjon, është duke iu dhënë një frymë jokombëtare që është kundër vendit dhe neve po na lidhet ideologjia me ideologjinë e Lindjes së Mesme apo Federatës Ruse”.
Në xhaminë ku Hyseni është imam, janë vendosur flamujt kombëtar me rastin e festës së 28 Nëntorit dhe ky ka qenë shkaku për nisjen e këtij konflikti.
Përkundër faktit se flamujt ishin vendosur me pëlqimin e komunitetit të xhamisë, një grup prej 20 vetash ishte dal kundër dhe kishin paralajmëruar se do t’i largonin flamujt.
Hyseni tha se ka pas sinjale që po tentohet të largohen flamujt por, Policia e Kosovës ka patrulluar në atë kohë gjë që veprimi i paramenduar nuk është kryer.
“Ka pas sinjale mirëpo, makina e Policisë ka qëndru të xhamia dhe nuk kanë guxu me tentu me i hjek. Përndryshe, çelësat e xhamisë i kam vetëm unë për momentin sepse janë ndërru të gjitha cilindrat dhe vetëm nëse thyhen dyert për me i largu flamujt se ndryshe nuk mund të futet askush brenda”.
Hyseni thekson se flamujt do të qendrojnë gjithmonë në Xhaminë e Bellopojës dhe 28 Nëntori ka qenë si shkas për të mos i larguar kurrë më.
Disa persona po tentojnë t’i largojnë flamujt në xhaminë e Bellopojës – SHQIP.com
“Flamujt kam pas qëllim me i lan vetëm për 28 Nëntor, por po më duket se do i lejë për gjithmonë ato flamure e mos me i largu asnjëherë. Qëllimi im në këtë xhami ka qenë që me e fillu me 28 nëntor dhe me u bë si shkak që me i lënë gjithmonë ashtu se flamuri dhe shqiponja e ka folenë aty ku janë trojet shqiptare. Nuk dua me e fetarizu por në anën tjetër nuk dua askush që me e arabizu”.
Si përfundim, Hyseni thotë se ky grup mendon se flamuri me shqiponjë në mes është në kundërshtim me praktikat fetare, prandaj edhe po tentohet që të largohet nga xhamia./Shqip.com
